Sabti, July, 27, 2019 (HOL)- Waxaa sii xoogeysanaya shakiga
laga qabo howsha guddiga u xil saran in ay mamulaan doorashada maamulka
Jubbaland oo dhawaan soo saaray Liiska Odayaasha dhaqanka soo xulaya
xildhibaannada.
Dowladda Federaalka ayaa horay
ugu gacan-seyrtay sax ahaanshaha Liiska, balse taa badalkeeda Jubbaland waxaa
ay joojisay wada-shaqeyntii kala dhaxeysa dowladda, iyada oo sheegtay in aysan
iman karin deegaannada Jubbaland cid ka socta dowladda dhexe ee Federaalka.
Laakiin dhinaca kale
musharixiinta u taagan xilka madaxweynaha maamulka Jubbaland ayaa isku raacsan
in aan lagu kalsoonaan karin howsha guddiga doorashada maamulka Jubbaland oo ay
ku tilmaameen in ay yihiin kuwo u janjeera dhinaca madaxweyne Axmed Maxamed
Islaam [Axmed Madoobe] oo laftirkiisa ah musharax madaxweyne.
Musharixiintu waxaa ay diiddeen
in ay ka qeybgalaan kulan wadatashi oo guddiga doorashadu isugu yeeray dhamaan
musharixiinta, sidoo kale waxaa ay ku gacan-seyreen Liiska Odayaasha ee lagu
dhawaaqay, iyaga oo sheegay in laga tagay Odayaashii dhaqanka saxda ahaa ee
Jubbaland.
Axmed Madoobe ayaa dhiniciisa ku
baaqay in musharixiinta looga fadhiyo in ay ku kalsoonaadaan sida ay wax u
socdaan, loona madax-bannaaneeyo howshooda guddiga doorashada.
Musharixiinta qaarkood ayaa
sheegay in haddii ay arrimuhu sidan ku sii socdaan laga yaabo in ay sameystaan
iyaguna guddi doorasho, taasoo sii xumeyn karta khilaafka haddaba ka jira geedi
socodka doorashada dowlad gobolleedka Jubbaland.
C/raxmaan Diini, Hiiraan Online
[email protected]