James Swan oo ahaa bartilmaameedka Qaraxii shalay ka dhacay Xarunta Gobolka Banaadir
Khamiis, July, 25, 2019 (HOL) –Afhayeenka dhinaca howlgalada
Al-shabaab Cabdicasiis Abuu-Muscab ayaa warbaahinta gudaha u sheegay in
bartilmaameedka Qaraxii shalay ka dhacay xarunta Dowladda Hoose ee Xamar uu
ahaa Wakiilka cusub ee Qaramada Midoobey ee Soomaaliya James Sawan oo booqday xarunta wax yar uu ka hor xiliga uu
qaraxu dhacay.
‘’Bartilmaameedka weerarkeenu wuxuu ahaa wakiilka Qaramada
Midoobey James Sawan,’’ ayuu yiri Cabdicasiis Abuu-Muscab oo la hadlay
warbaahinta gudaha.
Sarkaal ka tirsan laamaha Amniga oo lagu magacaabo Maxamed
Xusseen ayaa sheegay in haweeneyda is qarxisay gashay goobta uu shirku ka
socday, islamarkana isku qarxisay meel dhowr tallaabo u jirta halkii uu
fadhiyay Duqa Muqdisho Eng Cabdiraxmaan Cumar Cismaan Yariisoow.
Swan oo hadal qoraal ah soo saaray ayaa yiri’’ Waxaan
cambaarey-nayaa weerarka wuxuushnimada ah oo aan aheyn aheyn oo kaliya in uusan
karaamo siiney-nin nolasha Aadanaha, laakiin la diriraya xitaa shaqsiyaadka u
taagan in ay haggaajiyaan kana shaqeeyaan hormarka dadkooda’’ ayuu yiri James
Swan.
Hay’addaha Amniga ayaa waxaa hor yaala su’aal ah sida qofkan
is qarxiyay ugu suurtagashay in uu galo xafiiska guddoomiyaha, iyadoo la
ogyahay in xarunta gobolka Banaadir tahay goobaha ugu ilaalada adag xarumaha
dowladda.
Laakiin qaar ka mid ah saraakiisha hay’addaha Nabad-galyada
ayaa sheegay in qofkan laga yaabo in uu gacan mug leh siiyay qof kale oo ka
tirsanaa dadka nabad-galyada ugu xil saran xarunta, waxaana soconaya
baaritaanno dheeraad ah oo arintan ku saabsan.
Weerarkan ayaa waxaa cambaareeyay wakiilka gaar ah dowladda
Mareykanka u qaabilsan Soomaaliya, xoghayaha guud ee Qaramada Midoobey, hay’addo
caalami ah iyo dalalka saaxiibada dhaw la ah Soomaaliya.
C/raxmaan Diini, Hiiraan Online
[email protected]
