James Swan oo cambaareeyay Qaraxii shalay ka dhacay Aqalka dowladda Hoose ee Xamar
Khamiis, July, 25, 2019 (HOL)- Wakiilka
gaar ah ee Qaramada Midoobey u qaabilsan Soomaaliya James Swan oo daqiiqado ka
hor uun ka baxay maalintii shalay Aqalka dowladda Hoose ka hor inta uusan
Qaraxu dhicin ayaa si adag u cambaareeyay weerarka Ismiidaaminta ah ee lagu
qaaday xarunta.
James Swan ayaa kula shiray
maalintii shalay gudaha xarunta maamulka gobolka Banaadir gaar ahaan goobta uu
qaraxu ka dhacay mas’uuliyiinta maamulka oo uu horkacayo guddoomiyaha gobolka,
isaga oo ku amaanay howsha ay u hayaan bulshada gobolka ku dhaqan, hasse
ahaatee markii uu ka soo baxay xarunta ayaa lagu waramayaa in qof dumar ah oo
isku soo xirtay walxaha qarxa weerar khasaare ba’an geystay ku qaaday shir
looga hadlayay Amniga.
‘Waxaan si xoogan
oo u canbaareynayaa qaraxa ka dhacay xarunta maamulka gobolka Banaadir, inta
wax-yaaladu soo gaartay waan u duceyneynaa ayuu yiri ‘’ James Swan
Ilaa iyo hadda lama oga sida
qofka weerarka Ismiidaaminta ah geystay ugu suurtagashay in ay gudaha u gasho
goobta uu shirku ka socday, hasse ahaatee mas’uuliyiinta Amniga ayaa aaminsan
in qofkaasi loo fududeeyay in ay gaarto halka uu shirku ka socday, waxaana soconaya baaritaanno dheeraad ah,
iyadoo dib loogu laabanayo dhamaanba Kaamirooyinka ku xiran xarunta si ugu
yaraan loo helo macluumaad la xiriira qofka is qarxiyay iyo cida gacanta
siisay.
Ururka Al-shabaab ayaa durbaba
sheegtay weerarkan oo noqonaya kii ugu saameynta badnaa ee waayadan lagu qaado
xarun siweyn Amaankeeda loo ilaaliyo laguna wax-yeeleeyo mas’uuliyiin intaa la
eg.
C/raxmaan Diini, Hiiraan Online
[email protected]