Wararkii ugu danbeeyay xaalada caafimaad ee guddoomiyaha gobolka Banaadir iyo guud ahaa khasaaraha Qaraxii shalay
Khamiis, July, 25, 2019 (HOL)- Waxaa laga deyrinayaa xaalada
caafimaad ee guddoomiyaha maamulka gobolka Banaadir Eng Cabdiraxmaan Cumar
Cismaan Yariisoow oo dhaawac culus uu ka soo gaaray qarax maalintii shalay ka
dhacay xarunta maamulka gobolka Banaadir.
Mas’uuliyiin ka tirsan maamulka gobolka Banaadir ayaa
warbaahinta u sheegay in Eng Yariisoow uu dhaawac ka soo gaaray
qeybaha sare ee jirka sida caloosha iyo madaxa, waxaana uu galay ilaa Labo
Qaliin oo saacado badan qaatay, ilaa iyo haddana waxaa la sheegay in uu miir la’yahay
kuna jiro xaalad Suuxdin ah.
Saacadaha soo socda ayaa lagu wadaa in guddoomiyaha loo
qaado daweyn caafimaad oo dalka dibadiisa ah isaga iyo mas’uuliyiinta kale ee
ku dhaawacmay Qaraxa, waxaana la sugayaa diyaarad ka iman doonta magaalada Doha
ee dalka Qatar oo loo qaadi doono dhaawaca guddoomiyaha.
Dadka ku dhintay qaraxii shalay ayaa tiradooda lagu sheegay
7 ruux oo kala ahaa saddex guddoomiye degmo, saddex Agaasime iyo la taliyihii
dhinaca Sharciga ee guddoomiyaha maamulka gobolka Banaadir.
Dowladda Soomaaliya ayaa magacaawday guddi ka shaqeyn doona
gurmadka caafimaad ee loo sameynayo mas’uuliyiintii wax-yeeladu ka soo gaartay
Qraraxii Ismiidaaminta ahaa ee shalay ka dhacay Aqalka dowladda Hoose.
C/raxmaan Diini, Hiiraan Online
[email protected]
