Mid ka mid ah beellaha dega Galmudug oo soo dhaweeyay shirka dib-u-heshiisiinta Dhuusa-Mareeb
Arbaco, July, 24, 2019 (HOL)-Kulan ay magaalada Muqdisho ku yeesheen Siyaasiyiin,Aqoonyahano, Dhalinyaro iyo Haween mid ka mid ah beelaha dega Galmudug ayaa taageeray shirka dib u heshiisiinta Galmudug ee ka furmaya Dhuusa-Mareeb iyo guud ahaan socdaalka Ra'iisal wasaaraha ee deegaannadaas.
Ugaas Cabdulaahi Ugaas Xaashi Ugaas Faracade oo ka mid ahaa
waxgaradkii kulanka ka hadlay ayaa taageeray shirka dib u heshiisiinta
ee dhawaan ka furmaya magaalada Dhuuso Mareeb ayna isugu imaanayaan
beelaha dega Galmudug.
Kulan ay maanta magaalada Muqdisho ku yeesheen wax-garadka, culimada, aqoonyahanka, dhallinyarada iyo haweenka beesha ayaa si buuxda loogu taageeray dadaallada dowladda Federaalku ay ka waddo Galmudug ee isugu jira dib-u-heshiisiinta, dhismaha ciidamada iyo dhismaha dowlad Gobaleed Galmudug loo dhan-yahay.
Shirka ayaa lagu taageeray dadaallada Xukuumaadda
ay ka waddo Galmudug waxaa laga soo saaray war-murtiyeed kan:
- Beeshu waxa ay si buuxdo u taageersan tahay dadaalada xukuumadda
Soomaaliya ay ka waddo Galmudug ee uu hoggaaminayo Ra’iisul Wasaare
Xasan Cali Khayre.
- Beeshu waxaa ay Wasaaradda Arrimaha Gudaha Federaalka iyo dib-u-heshiisinta ku ammaaneysaa magacaabista Guddiga Qabanqaabada Shirweynaha Dib-u-heshiisiinta Galmudug ee loogu gogol xaarayo xal waara
oo laga gaaro khilaafaadka bulshada reer Galmudug
- -Beeshu waxa si buuxda u taageertay shaqada guddiga Qaban-qaabada Shirweynaha Dib-u-heshiisiinta Galmudug ee u xilsaaran xal ka gaarista khilaafaadka bulsho ee ka dhex jira beelaha Galmudug
- 4-Beeshu markii ay deristay xaaladda deegaannada Galmudug iyo dadaladda socda waxaa ay si wadajir ah u taageertay go’aanka guddiga iyada oo si buuxda uga qayb geleysaa gogosha nabadeed ee ka fidsan magaalada Dhuusamareeb
BAAQ
- Ugu dambeyn , Beeshu waxaa ay ugu baaqeysaa dhammaan beelaha Galmudug
in ay muujiyaan xil kasnimo iyo tanaasul si buuxdana ula shaqeeyaan guddiga qaban-qaabada shir-weynaha dib-u-heshiinta si xal waara loo gaaro looguna diyaar Garoobo dhismaha Galmudug loo dhanyahay oo lagu gaaro doorasho xor iyo xalaal ah.
5ta bisha Agosto ee nagu soo foolka leh ayaa lagu wadaa in magaalada Dhuusa-Mareeb uu ka furmo shirka dib-u-heshiisiinta beelaha dega deegaannada Galmudug, iyadoo la filayo in deegaannadaa ay ka dhacdo doorasho lagu soo dhisayo Galmudug lagu mideysan yahay.
C/raxmaan Diini, Hiiraan Online
[email protected]