Arbaco, July, 24, 2019 (HOL)-Afar xildhibaan oo ka tirsan golaha deegaanka Gabiley ayaa xabsiga loo taxaabay loona soo dhaadhiciyey magaaladda Hargeysa,
Xildhibaanadan ayaa ahaa qaaar
mucaarad ku ah maayarka Gabiley Maxamed Aamin Cumar, kuwaas oo doonayey in
xilka laga qaaado, waxaanay ku eedeeyeen fadhiidnimo, musuqmaasuq iyo waxqabad la’aan.
Inkastoo xukuumaddu wali ka hadal
xadhiga loo gaystay afarta xildhibaan oo aanu sharcigu ogolayn in la iska xidho
maadaama oo ay huwan yihiin xasaanadii dadkii soo doortay, haseyeeshee wararku
waxay sheegayeen in loo haysto khilaafka ka dhexeeya maayarka iyo xildhibaanada
qaarkood, kuwaas oo dalbanayey in kalfadhi xilka lagaga qaado uu maayarku u
qabto xidlhibaanadda golaha deegaanka ee Gabiley.
Wasaaradda arrimaha gudaha
Somaliland ayaa soo saartay wareegto ay ku mamnuucayso kalfadhiyadii aan
caadiga ahayn ee golayaasha deegaanka,kuwaas oo xilalka lagaga qaadayo
maayarada jooga, maadaama oo wakhtigoodii gabogabo marayo, isla markaana
sanadka u dambeeyey aan xil ka qaadis dhici Karin.
Xildhibaanada xabsiga loo
taxaabay waxay kala yihiin xildhibaan Buraale mawliid Aw Cabdi, Xildhibaan
Xasan Maxamed Dhegjar, Xildhibaan Mahdi Maxamed Xaashi Jiijaa iyo Xildhibaan
IId Xasan Cabdi.
Xildhibaanada golaha deegaanka ee
kale ayaa sheegay in hadii la wada xidhayo aanay joojin doonin inay xilka ka
qaadaan maayarka iyo ku xigeenkiisa, isla markaana ay ku socdaan sharciga iyo
dastuurka.
Dhinaca kale, maayarka Gabiley
Maxamed Aamin Cumar ayaa BBC-da ku
eedeeyey inay waraysteen nin isaga iska dhigay, taas oo uu xusay inuu dacwad ka
gudbin doono, haseyeeshee Idaacada BBC-da qaybteeda Af soomaaliga ayaa
raaligalin ka bixisay khaladkaasi ka dhacay dhankooga maadaama oo labada numbar
is waydaarteen,isla markaana qofkii lagu khaldamay iska dhigay inuu maayarka
Gabiley yahay sidaas idaacaddu ku waraysatay..
Barkhad-ladiif M. Cumar, Hiiraan Online
[email protected]
Hargeysa, Somaliland.
