Talaado, July, 23, 2019 (HOL)-Dowladda Soomaaliya ayaa ka hadashay dib u dhaca ku yimid doorashooyinkii la filayay inay ka dhacaan Galmudug, wixii ka dambeeyay 4-ta July ee bishan oo ku ekeyd muddo xileedkii Maamulka ee soo bilowday sanadkii 2015.
Wasiirka Wasaarradda Arrimaha Gudaha Xukuumadda Federaalka Soomaaliya Cabdi Maxamed Sabriye ayaa ka hadlay dib u dhaca doorashada iyo caqabadaha wali ka taagan dhismaha Galmudug loo dhan yahay.
Isaga ugu horeyn ka hadlayay safarka ra'iisal wasaare Kheyre ayuu yiri “Ra’iisul Wasaaraha muddo ayuu joogaa, dadaal badan waa sameeyay,
wuxuu arkay dhaqankii, dadkii iyo culimadii, meel walbana waa tagay
degmo iyo tuulo, waxaa uu ku guuleystay in deegaanka iyo maamulka la
isku soo dhoweeyo, horayna loo socdo”ayuu yiri Wasiir Cabdi Maxamed
Sabriye.
Wasiirka ayaa sheegay in ay jiraan arrimo la go'aasaday in wax laga qabto kuwaa oo hadda howshooda lagu guda-jiro, waxaana ka mid ah ayuu yiri arinta ciidamada la qarameeyay ee Ahlusuna , amniga magaalada Dhuusamareeb iyo, dib u heshiisiinta iyo arrinta doorashooyinka .
Mar uu ka hadlayay dib u dhaca doorashada ayuu sheegay in dadka la isku soo dhoweeynayo, isla markaana dhibaatada jirtay, khilaaf iyo waqtiga oo dhamaaday ay dowladdu go’aansatay in wax laga qabto.
Ra’iisul
Wasaare Kheyre iyo wafdi uu hoggaaminayo ayaa muddo bil ku dhow ku sugan
Galmudug, isagoo ku guda jira dadaalada lagu dhisayo Maamulka Galmudug
oo weli ay caqabado ka jiraan, kaddib markii qaar ka mid ah beelaha dega
Galmudug ay salluugeen qaabka Ra’iisul wasaaraha wax u wado.
C/raxmaan Diini, Hiiraan Online
[email protected]
