Isku soo bax iyo Buuq ka dhashay wax ka bedel lagu sameeyey xeerka ismaamulka gobolada iyo degmooyinka Somaliland
Axad, July, 21, 2019 (HOL)-Mudaharaad ayaa saaka ka dhacay magaalada Caynaba ka dib markii shalay golaha Wakiiladdu u ansixiyeen inay noqoto darajadda C, halka ay doonayeen in laga dhigo darajadda (B) oo uu madaxweynuhu u balanqaaday markii uu ololaha ku jiray in uu hal darajo kor u qaadayo.
Golaha wakiilada Somaliland ayaa
shalay ansixiyey wax ka bedelka iyo kaabis lagu sameeyey xeerka degmooyinka iyo
goboladda, waxaanay darajooyinka (A) u aqoonsadeen degmooyinka kala ah,
Hargeysa, Burco, Laascaanood, Boorama, Berbera, Ceerigaabo Iyo Gabiley.
Sidoo kale, xildhibaanaddu waxay
wax ka bedeleen tiradda golaha deegaanka ee degmooyinka oo Hargeysa oo markii
hore ahayd 25 xildhibaan waxay ka dhigeeen 17 xildhibaan, Burco, laascaanood,
Ceerigaabo, Berbera, Boorama iyo Gabiley oo ahayd 21 xildhibaan waxa laga
dhigay 13 xildhibaan, halka degmooyinka B-da oo awal ahayd 17 laga dhigay 11
xildhibaan, C-da waxa laga dhigay 9 xildhibaan, halka D-da laga dhigay 7
xildhibaan.
Sidoo kale,waxa wax laga bedelay magaca loogu yeedhayo xubnaha golaha
deegaanka oo loo bixiyey xubin gole deegaan halka ay markii hore ka ahayd xildhibaan deegaan, waxa
kale oo wax laga bedelay tiradda lagu ridayo maayiradda oo laga dhigay hal
dheeri halka markii hore ka ahayd saddex daloolow laba dalool ay xilka ka qaadi
karayeen.
Darajooyinka laga dhigay
degmooyinka oo aan waxba laga bedelin waxa saluug ka muujiyey degmooyin badan
oo doonayey in la dallacsiiyey balse sideedii hore loo daayey, taasina waxay
ahayd in degmada Caynabo saaka mudaharaad ku muujiso sida ay uga xun tahay in
aan la dalacsiin.
Xildhibaanada degmada Caynabo
kaga jira golaha Wakiilada ayaa ka soo horjeestay markii xeerkan la
ansixinayey, waxaanay ku doodeen in madaxweynuhu waraaq uu ku qiimeeyey in la
dalacsiiyo degmada Caynabo oo darajada B laga dhigo usoo qoray golaha wakiilada
balse la iska dhigo tirey oo laga hor yimid, isla markaana sideedii hore ee
darajada C-da lagu daayey, taas oo ay si cadho leh uga hor yimaadeen.
Mudaharaadkan saaka ka dhacay
Caynabo ayaa ka duwanaa mudaharaadyadii awal ka dhici jirey magaalooyinka,
waxaanay u dareenkooda u muujiyeen si ilbaxnimo ku jirto, kuwaas oo laamiyadii awal taayirada lagu gubi jirey ka
daayeen oo laamida dhinaceeda lagu gubay taayiro iyagoo ka ilaalinaya inay
laamadu burburto, taas oo dadweynihii reer Somaliland si weyn u hadal hayeen
sida ay u ilaaliyeen laamida iyo dantoodii guud.
Barkhad-ladiif M. Cumar, Hiiraan Online
[email protected]
Hargeysa, Somaliland.