Hargeysa: Maxkamad amar ka soo saartay hoteelka lagu caweeyo ee Beerta libaaxyadda inuu habeenkii shaqeeyo
Jimco, Janaayo, 04, 2019 (HOL)- Maxkamada gobolka
Maroodi jeex ayaa xayirtay wakhtiyad habeenkii inuu shaqeeyo hoteelka Beerta
libaaxyadda oo ahaa hudheel habeenkii lagu caweyn jirey.
Hudheelkan waxa cabasho ka soo gudbiyey
dadweynaha la jaarka ah, isla markaana waxay boolisku cabashaadasi u gudbiyeen
maxkamada gobolka Maroodi jeex,taasina waxay keentay in hudheelka habeenkii
aanu shaqayn.
Eedaha ay dadweynuhu usoo gudbiyeen booliska waxa
ka mid ahaa in hoteeka sameecado waaweyn oo heeso iyo miisiga habeenkii
ka baxaan oo jaarku ka seexan waayo, in dumar aan asturnayn ku caweeyo hoteelka
iyo in maandoorayaal lagu iibiyo hoteelka wakhtiyad habeenkii.
Maxkamada gobolka marka ay eegtay dacwadaasi laga
soo gudbiyey waxay soo saartay go’aan ah in wakhtiga habeenkii oo ka
bilaabmaya lixda makhribnimo illaa lixda subaxnimo aan la furi Karin hoteelka.
Go’aanka maxkamaddu waxay u qornayd sidan:
1.
Waxay maxkmadu xayirtay xilli gaar ah oo habeenimo oo ka bilaabmaysa
lixda habeenimo ilaa lixda subaxnimo hudheelka beerta libaxyada ee ku yaala
degmda gacan libaax ee magaaladda Hargeysa.
2.
Xayiraadan waxay ahaanaysaa mid taagan illaa inta go’aan ka soo baxayo dacwada
ka dhanka ah hudheelkan ee hay’ada sharciga soo gudbiyeen.
3.
Cidii xayiraadan maxkamda u hogaansami waydaa waa in la soo qabtaa
oo sharciga la horkeeno isaga oo maxbuus ah.
Waxaana amarkaasi xayiraada ku saxeexnaa
garsooraha gobolka Maroodi jeex Axmed Dalmar Ismaaciil.
Barkhad-ladiif
M. Cumar, Hiiraan Online
[email protected]
Hargeysa,
Somaliland.
