Jimco, Janaayo,
04, 2019 (HOL)- Munaasabad ay xilka ku kala wareegayeen gudoomiyaha cusub ee
Jaamacada Benadir Dr. Maxamed Max'uud Biday iyo guddoomiyihii hore ee
Jaamacadaas Dr. C/risaaq Axmed Dalmar ayaa lagu qabtay magaalada Muqdisho.
Dr. Max'ed
Max'uud Biday oo ahaa hormuudka Kuliyadda Caafimaadka ee Jaamacada Benadir ayaa
shirweynihii sanadlaha ahaa ee Muasasada Benadir loogu doortay 28kii Disembar
2018, inuu noqdo guddoomiyaha Jaamacadda Benadir sadexda sano ee socota, isagoo
badelaya Dr. C/risaaq Axmed Dalmar oo xilkaas hayey muddo ka badan 6 sano,
xilligii guddoomiyinamada ay ka dhammaatay.
Guddoomiyaha
xilka ka dagay ee Jaamacada Benadir Dr. Cabdirisaaq Axmed Dalmar oo
munaasabadaas ka hadlay ayaa ka warramay waxyaabihii u qabsoomay Jaamacadda
mudadii uu xilka hayey iyo horumarka ay ku talaabsatay.
"Waxaan ku
faraxsanahay maanta muddo lix sano iyo afar bilood ah ka dib inaan wareejiyo
xilka guddoomiyaha Jaamacada Benadir oo ay sharaf ii aheyd inaan muddo intaas
la'eg gudoomiye ka noqdo, guulaha aan sheegi doono waa kuwo ay wada gaareen
bahda Jaamacada Benadir oo dhan mudadii aan xilka hayey, markii aan guddoonka
qabanayey sanadkii 2012 ardayda jaamacadu waxay ahaayeen 1,006 arday, maantana
waxaa dhigata ardayd ka badan 3,222, Kuliyadaha Jaamacaddu waxay ahaayeen 7,
maantana waa 11, waxaan soo kordhinay dugsiga taqasuska oo aan horey u jirin
haatanna ay dhigtaan 214 aqoonyahan, ardayda qelin jebisay xiligaas ka hor
waxay aheyd 246 arday, mudadii aan xilka hayeyna waxaa ka qelin jebiyay 1,946
arday, Jaamacadu xiligaas waxay laheyd labo Kambas ama xarun, hadana waxay
leedahay 9 Kambas" ayuu yiri Dr. dalmar oo ku dheeraaday horumarka baaxada
leh ee jaamacadu ku talaabsatay mudadii uu majaraha u hayey, isagoo xusay in
jaamacadu ay furtay dugsi hoose/dhexe iyo sare oo raacsan, isbitaalka
Jaamacadda iyo xaruunta caafimaadka ee Afgooye muddadii uu xilkahayay. Wuxuu
kaloo xusay in Jaamacadda Benaadir ay xiriir iskaashi iyo wada shaqeyn la
leedahay hay’ado iyo jaamacado caalami ah iyo kuwo maxali ah.
Dr. Dalmar ayaa
gudoomiyaha cusub ee Jaamacadda Benadir Dr. Biday ku sifeeyey nin howlkar ah oo
ay muddo dheer soo wada shaqeeyeen, kuna kalsoon yahay inuu horumar intaas ka
badan u horseedi doono Jaamacadda, wuxuuna balan-qaaday inuu la shaqeyn doono,
khibradiisana ku caawin doono mudada uu xilka hayo, isagoo Madaxda iyo Maamulka
Jaamacada ugu baaqay iney gudoomiyaha cusub gacan ku siiyaan gudashada
waajibaadkii, wuxuuna ALLE uga baryey inuu xilkaas la garab galo.
Guddoomiyaha
cusub ee Jaamacadda Benadir. Prof/Dr. Max'uud Maxamed Xasan (Biday) oo isna
munaasabadan ka hadlay ayaa sheegay inuu ku faraxsan yahay xika loo doortay,
wuxuuna u mahad celiyey gudoomiyaha xilka ku wareejiyey oo uu ku amaanay inuu
horumar badan oo aan la soo koobi karin soo gaarsiiyey Jaamacadda, wuxuua
balan-qaaday inuu halkaas ka ambaqaadi doono, kuna socon doono dariiqii uu
jeexay Dr. Dalmar.
"Aniga iyo
saaxiibkey Dr. Dalmar ma nihin dad isku cusub, waxaan iskala tirsanahay
aasaasayaasha Jaamacadda, muddo badan waan soo wada shaqeynay, waana sii wada
shaqeyn doonaa, Marka labadeena qof yimid iyo qof tagaya midna ma jiro"
ayuu yiri Dr. Biday oo dhinaca kale ku dheeraaday qorsheyaasha dhow iyo kuwa
fog ee uu damacsan yahay inuu mustaqbalka ku horumariyo tirada iyo tayada
Jaamacadda.
Agaasimaha
Waaxda tacliinta sare ee Wasaaradda Waxbarashada dowlada Somalia C/shakuur Fiqi
oo isna munaasabadan ka hadlay ayaa u hambalyeeyey Gudoomiye Biday xilka cusub
ee loo doortay, isagoo Dr. Dalmarna ku amaanay shaqadii adkeyd ee uu ka soo
qabtay Jaamacadda mudadii uu xilka hayey, iyo doorkii hoggaamineed uu ka qaatay
dalladda Somaliren ee xiriirsa jaamacada Soomaaliya. Wuxuuna agaasimuhu talaabo
ku dayasho mudan ku tilmaamay sida xilkasnimada leh ee labada masuul ay xilka
iskugu wareejiyeen, isagoo dhinaca kale ka waramay qorsheyaasha Wasaarada ee
xoojinta tacliinta sare iyo xiriirka ay la leedahay Jaamacadaha dalka.
Senator Prof.
Cusmaan Maxamuud Dufle oo ah Xoghayaha addeega bulshada ee Aqalka sare ee
Baarlamanka Somalia oo gebagebadii xafladaas khudbad ka jeediyey ayaa soo dhoweeyey
isbedelka hogaanka Jaamacada Benadir.
"Waxaan
hambaleynayaa sida dimoqraadiyada leh ee gudoomiyihii hore iyo kan cusub ee
Jaamacada Benadir ay xilka iskugu wareejiyeen, runtii Dr. Dalmar mudadii uu xilka hayey
horumar aan la soo koobi karin ayuu jaamacada soo gaarsiiyey kaasoo uu ku
amaanan yahay, wuxuu kaloo xilka guddoomiyinamada wareejinayaa isagoo ay
waqtigiisii ka harsan tahay 8 bilood oo runtii ah arrin ugub ku ah hab-dhaqanka
madaxnimo ee Soomaaliya ku dayashana mudan. Gudoomiyaha cusubna waxaan ka
rajaynaynaa inuu halkaasii ka sii ambaqaado" ayuu yiri Dr. Dufle oo
dhinaca kale ka mid ah aasaasyaasha Jaamacada Benadir, wuxuuna is dul taagay
marxaladihii kala duwanaa ee ay soo martay Jaamacadda iyo sida looga soo gudbay
dhibaatooyinkii soo wajahay.
Intii
munaasabadda ay socotay waxaa maamulka iyo shaqaalaha Jaamacadda ay Prof.
Dalmar guddoonsiiyay billad dahabi ah oo uu ku mutaystay doorkii hoggaamineed
iyo horumarkii uu gaarsiiyay jaamacdda Benaadir xilligii uu guddoomiyaha ahaa.
Gebagebadii
Guddoomiyihii hore ee Jaamacadda Benadir Dr. Dalmar ayaa si rasmi ah xilka ugu
wareejiyey guddoomiyaha cusub ee Jaamacadda Dr. Biday, iyadoo guddoomiye Biday
uu isna dhinaciisa xilkii uu horey u hayey ee Hormuudka Kuliyadda Caafimaadka
ku wareejiyey Prof. Tahliil Cabdi Afrax oo xilkaas buuxiyey.
Xafladaas oo ku
soo dhamaatay jawi farxadeed ayaa waxaa sidoo kale intii ay socotay hadalo
isugu jiray hambalyo, guubaabo,maha celin iyo dardaaran ka jeediyey xubno fara
badan oo ay ka mid ahaayeen, Gudoomiyaha Mu'asasada Benadir Dr. C/llaahi Shiikh
Xuseen (Bushkuleeti), Gudoomiyaha Ururka Dhaqaatiirta Soomaaliyeed Dr. Maxamed
Yuusuf Xasan, La-taliyaha Wasiirka Waxbarashada Somalia Ismaaciil Yuusuf, Prof.
Dr. Maxamed Maxamuud Cali ( Fuje), Prof. Cabdiraxmaan Macallin Fiqi iyo xubno
kale oo ku hadlay magaca qeybaha kala duwan ee bulshada.
C/raxmaan Diini, Hiiraan
Online
[email protected]
