Axad, Feberaayo, 17,
2019 (HOL)- Maxkamadda Darajada koowaad ee
gobolka Bari ayaa maanta xukun dil ah ku riday dhallinyaro ku eedeysnaa dilka
Nin ganacsade ah.
Abuukar Cabdinuur Jaamac, oo ah
guddoomiyaha maxkamadda Darajada koowaad ee gobolka Bari oo ku
dhawaaqayey xukunka raggan ayaa sheegay in dhammaan raggan lagu helay dambiyada
lagu soo eedeeyay kaddib caddeymo iyo markhaatiyaal la horkeenay maxkamadda.
Ragga xukunta dilka ah lagu riday
ayaa maxkamaddu sheegtay in 11-kii bishan ay gudaha Boosaaso dil ugu
geysteen ganacsade Salaad cabdi Cukaash xilli uu kasoo baxay saladda cishe
masjid ku yaalla xaafada Raf iyo Raaxo ee magaalada Boosaaso.
Magacyada dhallinyaradan ay
maxkamadu xukuntay ayaa kala ah Daahir Dalmar Saalax, Farxaan siciid Yusuf,
Cabdiftaax Axmed Xasan, Maxamed cabdiraxman Maxamuud.
Ugu dambeyn,maxkamada ayaa sheegtay
in ciddii aan ku qanacsanayn xukun dhallinyaradan ay u furantahay Racfaan dhan
soddon maalmood.
Iman Mohamed Jama, Hiiraan Online