Shirkadda DP World oo Berbera ka bilowday inay boqolkiiba lixdan kor u qaado adeega Biyaha ee gobolka Saaxil
Sabti, Feberaayo, 16, 2019 (HOL)-
Shirkadda Ganacsiga Dunida,DP World, ayaa
daahfurtay xarun cusub oo qaybinta biyaha ah, taas oo kor loogu qaadayo 60
boqolkiiba adeegga biyaha ee Berbera.
Mashruucan oo ay ku baxayso $1 malyan wuxuu
bilaabmay 2018, waxaana ku jira afar ceel biyood, laba barkadood, laba dar
biyood, Taangi Sagbad ah oo biyo kaydiye ah, beeb biyood oo dhererkiisu yahay
7.0 km oo ku xidhiidhsan ilaa kaydka biyaha.
Mashruucan, wuxuu ku shaqeeyaa tamarta qoraxda
iyo koronto-dhaliyaha, sidoo kale waxaa ka mid ah dhismaha masaajid meel u dhow
xarunta qaybinta biyaha.
Mashruucan ayaa loogu tallogalay inuu hoos u
dhigo biyo yaraanta Berbera iyo in biyo nadiif ah la siiyo dadka deegaanka iyo
bulshada reer miyiga ah. Mashruucan wuxuu ka mid yahay istaraatijiyada DP World
ee joogtaynta horumarka Somaliland, maaddaama korodhka biyaha ee la
filayo loo baahnaan doono iyada oo ay ugu wacan tahay koritaanka Berbera,
taas oo dardargelinayso maalgashiga DP World ee dekedda Berbera.
Saddex ceel ayaa lagu wareejiyey Dawladda Hoose
ee Berbera, iyada oo ceelka afraad iyo laba barkadoodna oo loo qoondeeyey
biyo cabitaan oo bilaash ah, oo loogu talagalay bulshada deegaanka iyo
xoolahoodaba.
Madashii lagu daahfureyey waxa laga sheegay in
Tan iyo 2017-kii DP World ay kor u qaaday adeegga Dekedda Berbera 70%, waxayna
kordhiyeen awoodda waxqabad ee dekadda 50%. Haatan DP World Berbera waxa ay
horumarineysaa hal-abuurka maxaliga ah, waxaana tababar gudaha iyo dibada
ahba siisay in ka badan 2700 qof oo reer Somaliland ah sannadkii 2018.
Suhail Al Banna, Madaxa Guud iyo Maamulaha
DP ee Bariga Dhexe iyo Afrika, oo arrimahaasi ka hadlaya ayaa yidhi “
Taageerada Berbera waa qayb ka mid ah ballanqaadkeena si aan gacan uga geysano
horumarinta aagagga aan ka shaqeyno, waxaanan kalsooni ku qabnaa in mashruucani
uu faa'iidooyin muhiim ah u leeyahay dad badan oo ku baahsan gobolka. Waxaan ku
rejo weynahay in aan wax walba oo aan qabanno ka dhigno mid dadka Somaliland
jooga ka dheefaan faa’iido muddo dheer, waxaanan ku
niyadsamahay in aan si dhaw ula shaqeyno mas'uuliyiinta Somaliland iyo dadka,
si loo hagaajiyo tayada nolosha iyada oo loo marayo kaabayaasha muhiimka ah iyo
mashaariicda joogtaynaya horumarka.”
Qorshaha DP World ee Somaliland waxay sheegeen
inay ka mid tahay kafaala-qaadka 11 dugsi, Akadeemiyadda waxbarashada badda,
laba cisbitaal, iyo xarun caafimaad. DP World waxa ay 4.5 milyan oo litir oo
biyo ah ugu deeqday guddigii taakulaynta abaaraha ee Berbera sanadkii 2017, si
loogu gacan-qabto 15,000 oo qoys.
Barkhad-ladiif
M. Cumar, Hiiraan Online
[email protected]
Hargeysa,
Somaliland.