Talaado, Augusto, 20, 2019 (HOL)- Garoonka
diyaaradaha magaalada Kismaayo ayaa Isniintii shalay leyska hortaagay in ay ka
degto diyaarad militari oo laga leeyahay dalka Itoobiya, arrintaa oo la sheegay
in ay salka ku heyso khilaafka ka dhashay doorashada Jubbaland.
Dowladda Soomaaliya ayaa Sabtidii toddobaadkan
sheegtay in aysan aqoonsan doonin natiijo kasta oo ka soo baxda doorashada
Jubbaland oo ah mid sharciga baaalmarsan, laakiin guddiga doorashada ayaa ku
gacan seyray go’aanka dowladda ee ka dhanka ah doorashada, iyaga oo sheegay in aan
waxba laga badali doonin jadwalka iyo hannaanka hadda loo wado in doorahada
madaxweynuhu ku dhacdo.
Is hortaaga lagu sameeyay diyaarada militari ee
Itoobiya ayaa xiisad ka dhax abuurtay ciidamada Itoobiya iyo kuwa Kenya ee
maamul Garoonka diyaaradaha Kismaaayo, balse ma jirin wax iska horimaaad ah oo
labada dhinac dhaxmaray.
Qof ka tirsan shaqaalaha Garoonka diyaaradaha
Kismaayo oo magaciisa ku soo kooban Ismaaciil ayaa sheegay in diyaaradan oo
markii hore ka soo duushay Gobolka Gedo ugu danbeyntii ku degtay Garoonka
diyaaradaha Baydhabo, isaga oo intaa ku daray in uusan kala cadeyn karin nooca
diyaarada in ay aheyd diyaarad rayid iyo mid militari.
‘’Waxey dooneysay in ay ku soo degto Garoonka
Kismaayo, waa loo diiday, sababto ah horey uma aysan soo dirin wax macluumaad
ah oo ku saabsan socdaalkeeda’’ayuu yiri Ismaaciil.
Toddobaad ka hor magaalada Kismaayo waxaa shir ku
yeeshay taliska ugu sareeya howlgalka midowga Africa AMISOM iyo madaxweyne
Axmed Madoobe, kuwaa oo isku afgartay qoddobo ku saabsan hannaanka sugid Amniga
doorashada, laakiin dowladda federaalka iyo beesha caalamka ayaa u
arka sida loo maamulayo doorashada mid aan u wanaagsaneyn Amnig Kismaayo iyo
guud ahaanba Jubbaland.
C/raxmaan Diini,
Hiiraan Online
[email protected]
