Talaado, Augusto, 20, 2019 (HOL)- Faah faahinno dheeraad ah
ayaa ka soo baxay dagaal wabarigii hore ee saakay ku dhaxmaray dulleedka
degmada Jowhar ciidamada dowladda Soomaaliya iyo xoogagga Ururka Al-shabaab.
Dagaalka ayaa yimid kaddib markii waabarigii hore ee saakay dagaalyahanno ka
tirsan Ururka Al-shabaab weerar ku qaadeen saldhiga ciidamada militariga
dowladda Soomaaliya ku lahayeen deegaanka Keli Waraaboow oo qiyaastii 4KM
dhanka galbeed uga beegan degmada Jowhar,
Goobjoogayaal deegaan ku sugan ayaa warbaahinta u sheegay in ay maqlayeen
dhawaqa rasaasta ay isku adeegsanayeen labada dhinac, balse ma aysan sheegin
haddii ay og yihiin wax khasaare ah oo soo kala gaaray labada dhinac.
Laakiin Al-shabaab ayaa bogga Internetka warar ay ku qoreen waxaa ay ku sheegeen in ay
mudo kooban la wareegeen fariisinka ciidamada dowladda, islamarkaana ay ka qaateen
saanad millateri,.
Weerarkan ayaaa ku soo beegamaya xilli deegaano
iyo degmooyin badan oo ka tirsan Gobollada Labada Shabeelle ay ka socdaan
howlgallo ka dhan ah Ururka Al-Shabaab.
C/raxmaan Diini,
Hiiraan Online
[email protected]
