Xisbiga WADDANI oo sheegay inay ka baxeeen heshiishkii saddexda xisbi wada gaadheen
Axad, August, 18, 2019 (HOL – Hogaamiyaha xisbiga WADDANI Xirsi Cali Xaaji Xasan ayaa
sheegay in xisbiga WADDANI gabi ahaanba ka baxay heshiiskii saddexda xisbi ee
beesha caalamkuna darafka ka ahayd kadib markii ay xukuumadda Kulmiye Burisay
heshiiska.
Hoggaamiye Xirsi oo warbaahinta
la hadlay ayaa sheegay in guud ahaanba heshiiska laga majaro habaabiyay
dariiqiisii ahaa in Golaha Wakiilladu heshiiska ansixiyo ama diido,
islamarkaana looyar la taliye u ah shir guddoonku hor istaagay heshiiska.
“Waxa wax aad loogu qoslo ah oo
la yaab leh heshiiskii Madaxweynuhu hormuudka ka ahaa ee miiskiisa lagu
saxeexay ee labada xisbi mucaarad guddoomiyeyaashoodu wax ka saxeexeen ee aan
Qaranka cidi u maqnay beesha caalamkuna inagu wehelisay ee markhaatiga ka ahayd
ee ay inagala shaqaysay in la yidhaahdo ‘inan looyar ah baa diiday oo yidhi waa
sharci darro’ oo madaxweynaha iyo intaas oo dhan waxay isku raacday waa sharci
darro waa wax aad loola yaabo oo lagu qoslo. Qofka looyarka ah ama sharci
yaqaanka ahi aragtidiisa sharci ayuu sheegi kara laakiin heshiiska oo
nuxurkiisu ahaa in golaha la hor geeyo goluhuna ama diido ama yeelo oo sida
heshiiska ku qoran ansixiyo ama diido, heshiiska waxa kaliya oo wax ka bedeli
karayay, burin karayay ama laali karayay diidmada goluhu diido, xisbiyada
mucaaradka ee aanu ka mid nahayna way ku talo galeen in haddii goluhu diido
sidiisii loogu dhaqmo qodob ka mid ahna weeye haddii uu ogolaadana in 9 laga
dhigo.”ayuu yidhi Xirsi oo ka hadlayey diidmada ay ka muujiyey qaabkii golaha
Wakiiladu u laalay mooshinkii lagu kordhin lahaa xubnaha guddida
doorashooyinka.
“Waxa muuqata in xukuumadda
Kulmiye ee madaxweynaheedu saxeexay iyo xisbiga Kulmiye ee guddoomiyihiisii
goobjooga ahaa in ay si indho la’aan ah heshiiskii u buriyeen maaddaama ay
buriyeen oo ay ka hor yimaaddeen qodobadii heshiiska oo aanay sidiisii u raacin
anagana mawqifkayaga WADDANI waxa weeye waanu ka baxnay oo heshiiskaasi nama
qabto waanu ka baxnay, laga bilaabo maanta heshiiskaasi uma xidhnin laakiin,
waxaanu ogol nahay haddii miiska wada hadalka la isugu yimaaddo oo hawshii dib
loo wadayo oo ay ka noqdaan khaladkoodii oo ay garwaaqsadaan oo madaxda kale
beri ka noqdaan anagu waxaanu tuhunsanahay in ay iyagu dabada ka riixayaan haddii
se ay yidhaahdan beri baanu ka nahay oo idinkala niyad baanu nahay in
heshiiskii la sii wado anaguna wixii Qaranku ku heshiiyo ama maslaxadda umadda
ah ka talo goosan mayno,” ayuu raaciyey hadalkiisa.
Golaha Wakiilada ayaa shalay
laalay heshiishkii saddexda xisbi, isla markaana la taliyaha arrimaha sharciga
ee golaha Wakiilada ayaa sheegay in mooshinkaasi jabay mar hadii lagu kala
kacay, waxaanay galeen fasaxoogii caadiga ahaa.
Barkhad-ladiif M. Cumar, Hiiraan Online
[email protected]
Hargeysa, Somaliland.