Sabti, August, 17, 2019 (HOL – Golaha Wakiiladda Somaliland ayaa laalay heshiishkii saddexda xisbi ku heshiiyeen in komishanka doorashooyinka lagu kordhiyo laba xubnood.
Taliyaha sharciga ee golaha
Wakiilada Somaliland Gar-yaqaan Mustafe Maxamed Daahir ayaa sheegay inuu jabay
mooshinkii wax laga bedelay xeerka doorashooyinka ee lagu kordhiyey laba
xubnood guddida doorashooyinka.
Golaha wakiilada ayaa loo
gudbiyey mooshin wax lagaga bedellayo
xeerka doorashooyinka oo guddida doorashooyinka oo ahaa todoba xubnood laga
dhigi lahaa sagaal xubnood, haseyeeshee waxa uu taliyaha sharcigu sheegay mar hadii
laga dooday xeerkaasi aan dib loo soo celin Karin inta lagu guddo jiro
kalfadhigaas, sidaas darteed waxay ka dhigan tahay in golaha wakiiladu ka hor
yimaadeen wax ka bedelka xeerkaasi iyo heshiishka saddexda xisbi.
“Waxaa isoo baxay in aan la furi Karin mooshin khuseeya
kalfadhigaasi oo goluhu hore uga dooday, waxaanu u dhigan yahay qodobkaasi lama
furi karo mooshin hadii uu arinta uu ka hadlayo ama mooshinku khuseeyo uu
goluhu ka dooday isla kalfadhigaasi, sidaas buu mooshinkaasi ku jabay mana
waafaqsana xeer hooasaadka soo jeedin kasta oo ku saabsan wax ka bedelka
xeerkan “ayuu yidhi taliyaha arrimaha sharciga ee golaha Wakiilada Mustafe
maxamed Daahir.
Sidoo kale, goluhu wuxuu gallay
fasaxiisii caadiga ahaa oo dhan 45 cisho, taasina waxay dib u sii riixaysaa in
doorasho wakhtigeedii u dhacdo.
Dhinaca kale, labada xisbi
mucaarad ayaa cambaareeyey talaabooyinka ay qaadeen golaha Wakiilada, waxaanu
ku eedeeyeen in xukuumaddu dabada ka riixayso in mooshinkaasi la ogolaado,
waxaanay xuseen inay xukuumada iyo xisbiga KULMIYE ka gaabiyeen inay ka
hawlgalaan in heshiishkii saddexda xisbi la ansixiyo.
Xisbiyada mucaaradka ayaa sheegay
in mooshinkan in la hor istaago ay ka dambaysay xukuumaddu,isla markaana
gudoomiyaha golaha Wakiiladda lagu cadaadiyey inuu golaha soo xidho si aanu
mooshinkaasi usii socon.
Barkhad-ladiif M. Cumar, Hiiraan Online
[email protected]
Hargeysa, Somaliland.