Duqa magaalada London oo la kulmay Jaaliyadda Soomaalida iyo Qoyska uu ka geeriyooday Eng Yariisoow
Khamiis, Augusto, 16, 2019 (HOL)–
Sadiiq Khan Duqa magaalada London ayaa ka qeybgalay munaasabad loogu
baroordiiqayay geeridee ku timid Duqii hore ee Muqdisho Eng Cabdiraxman Cumar
Cismaan Yariisoow oo u geeriyooday dhaawac culus oo ka soo gaaray weerar
ismiidaamin ah oo ka dhacay xarunta gobolka Banaadir.
Sidoo kale munaasabada Tacsida
waxaa joogay oo ka qeybgalay Qoysaska marxuumka iyo carruurtii uu ka tagay oo
qaarkood ay goobta isku gacan qaadeen.
Duqa magaalada London Sadiiq Khan ayaa uga tacsiyadeeyay qoyska geerida
Marxuumka, sidoo kale waxaa uu sheegay inay sharaf u aheyd inuu ka qeyb galo
munaasabadda xuskan, isagoo xusay inay ku xusuusan doonnaan geesinimadiisa,
niyad wanaaggiisa iyo mustaqbalka wanaagsan.
Duqii hore ee Muqdisho Eng. Yariisow ayaa muddo dheer ku noolaa magaalada
London, wuxuuna kaga jiray dadka kaalinta firfircoon ku lahaa qurbo joogta
Soomaalida magaaladaas ku noolaa, isagoo ka noqday Hoggaamiye bulsho iyo
maamule iskuul, sidoo kale wuxuu madax ka ahaa Ururka u dooda xuquuqda
Soomaalida ee UK, Somali Concern Group ee UK.
C/raxmaan Diini, Hiiraan Online
[email protected]
