Ciidanka Militeriga Somaliland oo ka hadlay Direys Ciidan oo loo keenay ilaalada gudoomiyaha xisbiga WADDANI
Talaado, April, 09, 2019 (HOL)- Afhayeenka Ciidanka
Militeriga Somaliland Gaashaanle sare Cabdiraxmaan Cabdilaahi Xasan ayaa ka
hadlay direys loo keenay ilaaladda gudoomiyaha xisbiga WADDANI Cabdiraxmaan
Cirro oo xukuumaddu gacanta ku dhigtay.
Afhayeenka ayaa sheegay in askari kasta uu direyskiisa ku
leeyahay ciidanka uu ka tirsan yahay, haseyeeshee direys gaar ah aanay cidi u
keeni Karin, isla markaana ay tahay sharci daro cidii keenta direys aanay
dalban ciidamada kala duwan ee Somaliland.
“ Askarta ilaalisa madaxda kala duwan ee dalka iyo
hay’addaha madax banaan waxay ka tirsan yihiin ciidamada qaranka, askari
kastaana direyska uu xidhan yahay wuxuu ku leeyahay ciidanka uu ka tirsan
yahay sida uu sharciga ciidamada Somaliland dhigayo, ka ciidanka Militeriga ka
tirsani ciidankiisu ku leeyahay dirayskiisa, ka booliska ka tirsanna booliska
ayuu ku leeyahay direyskiisa, ma ogin xisbi direys gaar ah dalbaday oo askar
gaar ahi u shaqayso oo iyagu ciidankiisa gaar ugu dalbada “ayuu yidhi
Afhayeenka ciidanka Militeriga Somaliland.
Sidoo kale, waxa uu afhayeenku sheegay in cidda kaliya ee
dalban karta dirays uu yahay taliyeyaasha ciidamadda kala duwan oo qudha,
waxaanu yidhi “Warqad cashuur dhaaf ah oo uu qoray Gaashaanle sare Cali rooble
Bulaale oo ka tirsan ciidanka qaranka oo uu soo dhigay warbaahinta afhayeenka
xisbiga Wadani uu sheegay in warqadaasi loogu ogolaaday
direyskaasi, sida sharcigu dhigayo direys cashuur dhaaf ah waxa u samayn kara
taliyaha ciidanka ayaa ka dalbanaya wasaarada Maaliyada in cashuur dhaaf
loo sameeyo direyskaasi sida taliyaha ciidanka Militeriga ama taliyaha ciidanka
booliska ama taliyaha ciidanka asluubta hadii cid waliba qorto waraaq waxay
noqonaysa fawdo.”.
Afhayeenka xisbiga WADANI Barkhad Batuun ayaa sheegay in
direyskan ay Saylac ka soo qaateen u ogolaaday sarkaal ka tirsan ciidanka
qaranku, haseyeeshee ciidanku waxay beeniyeen arrintaasi oo uu ku tilmaamay mid
sharciga ka baxsan oo taliyaha guud mooyee cid kale aanay ogolaan Karin in
direys dalka la soo galiyo.
Sidoo kale, Gaadhigii gudoomiyaha xisbiga WADANI
Cabdiraxmaan Cirro ee direyska lagu qabtay ayaa maanta dib loogu soo celiyey
gudoomiyihii, haseyeeshee waxay wararku sheegayaan in laga reebay direyskii la
socday.
Barkhad-ladiif M. Cumar, Hiiraan Online
[email protected]
Hargeysa, Somaliland.
