Talaado, April, 09, 2019 (HOL)- Waxaa magaalada Washington ee dalka Mareykanka
ku sugan wafdi uu horkacayo ra’iisal wasaaraha xukuumadda Soomaaliya Xassan
Cali Kheyre oo halkaa uga qeybgali doona shir ay soo qaban qaabiyeen
Bankiga Adduunka iyo IMF.
Shirkan ayaa intiisa badan lagu gorfeyn doonnaa
hormarada ka jira gudaha dalka Soomaaliya iyo hannaanka maaliyadeed ee dalka,
iyadoo dowladdu rajo badan ka qabto in ugu danbeyntii laga cafiyo Soomaaliya
deymaha lagu leeyahay.
Ra’iisul Wasaare Kheyre ayaa inta uu joogo Washington waxaa uu kulamo kala
duwan la yeelan doonaa Madaxda Bankiga
Adduunka, IMF iyo mas’uuliyiinta kale ee shirka ka qeyb galaya.
Waxaa sidoo kale jiri doona su’aalo ra’iisal wasaaraha la weydiinayo oo
dhamaantood la xiriira caqabadaha hor gudban dowladda uu ra’iisal wasaaraha ka
yahay iyo waliba sida ay u wahayaan xal u helida caqabadaas.
Wafdiga Ra’iisul Wasaaraha ayaa waxaa ka mid ah
wasiiro ka tirsan xukuumaddiisa, sida Wasiirka Maaliyadda, Qorsheynta,
Guddoomiyaha cusub ee Bankiga Dhexe iyo La Taliyeyaal ka tirsan xafiiskiisa iyo
xafiiska Madaxweynaha.
Shirka uu ra’iisal wasaare Kheyre uga qeybgalo
magaalada Washington ayaa imanaya xili dowladdaha ay la daalaa-dhaceyso xalinta
mashkalado la xiriira dhinaca Amniga iyo gadood ay sameynayaan ciidamada oo ka
cabanaya mishaar la’aan muddo ku dhan Afar bilood.
C/raxmaan Diini,
Hiiraan Online
[email protected]
