Jimco, April, 05, 2019 (HOL) – Madaxwaynaha DDS Madaxwayne Mustafe Cagjar ayaa mar uu
maanta shir jaraa'id Xafiiskiisa ku qabtay kaga hadlay qodobo muhiim ah oo
xaaladda degaanka ee wakhti xaadirkan ku saabsan.
Ugu horeyn waxaa uu sheegay
madaxwaynuhu in maanta laga bilaabo la joojiyay Shirar Qabiil uu qabsado isagoo
Siyaasad kaga hadlaya, balse qabiiladu ay kulamo yeelan karaan ay kaga hadli
karaan sida in la dhex dhexaadinayo ama la heshiisiinayo qabiilo is haysta iyo
in mag la kala qaadayo. sidoo kale ciddii u baahan inay siyaasad ka hadashana
ay samaystaan Xisbiyo iyagoo u maraya qaab sharci ah ama xisbiyada siyaasadeed
ee jira ku biira.
Shirkan jaraaid ayaa sidoo kale
Madaxwaynuhu isagoo amar siinaya ciidamada nabadgalyada ee degaanka sheegay
inay Ciidamadu sugaan amniga guud ahaa degaanka, kana hortagaan fal kasta oo
lid ku ah nabadgalyada degaanka iyo banaan baxyada aan sharciyaysnayn ee ay soo
abaabulayaan waxa uu ku tilmaamay dad kasoo horjeeda deganaanshaha degaanka.
Madaxwaynuhu mar uu ka hadlayey
maamulkii hore ee degaanka gaar ahaan kooxdii lamagac baxday Heego ayuu sheegay
in cafiskii la cafiyay lagala noqday maadaama ay bilaabeen kicin dadwayne waa
siduu hadalka u dhigayee isla markaana lala tiigsanayo sharciga meel walboo ay
ku sugan yihiin.
Mar uu ka hadlayay Madaxwaynuhu
dhanka Ururka ONLF ayaa waxaa uu sheegay in kawaadiirta Ururkaasi ku hawlan
yihiin sidii shacabka la isooga hor keeni lahaa iyadoo la adeegsanayo qaab
qabiil waa siduu hadalka u dhigayee isla markaana faray inay ka fogaadaan
hawlaha iska horkeenka qabiil.
Hadaladan uu maanta madaxwaynuhu
shirka jaraa'id ku sheegay ayaa kusoo hagaagaya xilli guux hoose uu ka dhex
jiray shacabka degaanku, isla markaana meelo kamid ah degaanka ka jireen
banaanbaxyo.
C/raxmaan Diini, Hiiraan Online
[email protected]