Ganacsade Axmed Cismaan Geelle oo sheegay in Hanti gaadhaysa 128 Milyan oo doolar lagaga haysto Jabuuti
Jimco, April, 05, 2019 (HOL) – Afhayeen
u hadlay Ganacsade Axmed Cismaan Geelle oo magaciisa la yidhaahdo Axmed Cali
Nuur ayaa ka jawaabay hadalkii ka soo baxay madaxtooyada Somaliland ee lagaga
hadlay dacwada Baan uu lacag ka soo amaahday, taas oo ay isku khilaafsan yihiin
Baankii iyo gancsadihiiba.
Afhayeenka ganacsadaha Axmed Cali Nuur ayaa
sheegay in Jabuuti ka haysato hanti lagu qiyaasay boqol iyo sideed iyo labaatan
Milyan oo doolar, isla markaana Baanka lacagta ka doonaya u sheegay in hantidda
Jabuuti u taalla ay u qaataan labaatanka milyan ee deynta kaga soo qaateen.
“Baanka madaxtooyada Somaliland ka hadashay
magaciisa saxda ahi waa BCIMR oo dawlada Jabuuti badh ahaan leedahay sida ku
cad heshiishka saamileyda Baanka, bulshada Somaliland waxay ogsoon tahay in
aanu jirin dunida Baan hadyad ahaan lacag iskaga bixiya, balse taas bedelkeedda
Baankasta oo ku xidho shuruudo Rahan ama hanti maguurto ah oo ka badan deynta
uu Baanku ganacsadaha siinayo”ayuu yidhi Afhayeenka Ganacsadaha la eedeeyey.
waxaanu intaas ku daray “ Waxa jirta in
aanu heshiish la gallnay Baankaasi aan soo sheegnay muddo laga joogo 24 bilood
deyn dhan labaatan milyan baanu ka qaadanay oo dollar sida sharcigu dhigayo
Baankii wuxuu naga dalbaday Rahan ka badan deynta aanu rabno kuna taalla dalka
Jabuuti, waana ku wareejinay Rahankii baankii deynta na siinayey sanadkii 2017
bishii April, waxaana heshiishka baankaasi laga diiwaangaliyey dawlada Jabuuti,
waxaana ku heshiinay inuu Baanku naga hayo hanti ma guurto ah oo qiimaheedu
dhan yahay 25 milyan oo dollar.”
Afhayeenka Axmed Cali Nuur oo ka hadlay halka
khilaafka ganacsadaha iyo xukuumadda Jabuuti ka bilaabmay waxaanu yidhi “Qoyska
madaxweynaha Jabuuti waxay qasab kaga dhigtay ganacsade Axmed Cismaan Geelle
inuu saamiyo ka siiyo shirkadihiisa Jabuuti iyo Somalilandba, arrinkaasi wuu ka
diiday ganacsade Axmed Geelle, maadaama oo aan xaq iyo xeertoona loogu lahayn,
ka dibna waaran qabasho ah ayaa loo soo saray isagoo Axmed Cismaan Geelle
jabuuti ka maqan isna kuma noqon Jabuuti, ka dibna waxay bilaabantay in
tobankii shirkadood ee Jabuuti uga shaqaynayey ay bililiqaysteen qoyska
madaxtooyada Jabuuti oo afartii ugu waaweyna kala qaateen qoyskiisu intii
kalena waa la xidhay hanti dhextaalayna waa la qaatay.”
Afhayeenka madaxtooyada Somaliland ayaa sheegay
in Baankii lacagta amaahiyey ka rabo lacagtii,isla markaana uu dacwad ka dhan
ah ganacsadaha ka furteen maxkamadaha Hargeysa, taasina ay keentay khilaafka
heerkaasi gaadhay.
Barkhad-ladiif
M. Cumar, Hiiraan Online
[email protected]
Hargeysa,
Somaliland.