Kheyre : Waxaan bixinay lacag dhan 100 milyan oo dollar oo lagu lahaa dowladdihii naga horeeyay
Jicmo, April, 05, 2019 (HOL) –Ra’iisal wasaaraha
xukuumadda Soomaaliya Xassan Cali Kheyre
ayaa sheegay in mudadii labada sano aheyd oo ay jirtay dowladda uu ra’iisal
wasaraha ka yahay aan lagu yeelan wax deyn ah.
Taa badalkeeda ayuu sheegay in ay bixiyeen lacag
dhan 100 milyan oo dollar oo sida uu hadalka u dhigay lagu lahaa dowladdihii
iyaga ka horeeyay, kuwaa oo ku macneeyay in ay ahaayeen lacago loo maamulay si
aan habooneyn.
“Maalintii
aan nimid ilaa iyo hadda dowladda majirto cid deyn ku leh, markii aan nimid waxaa dowladda lagu lahaa lacag 100 milyan dollar ah oo lagu lahaa dowladihii naga horeeyay, kuwaa isugu jiray mishaar la bixin waayay ama cid qadraas la siiyay ayuu yiri ra’iisul wasaare Kheyre.
Wuxuu sheegay in dowladda Soomaaliya ay kasoo
baxday dhamaan shuruudiihii ugu waaweynaa iyo in canshuurta ay ganacsatada
Soomaaliyeed bixiyaan ay mareyso meshii ugu wanaagsaneyd.
Ra’iisal wasaaraha Soomaaliya ayaa marar badan
oo hore ku celceyay in daqliga soo
xarooda uu aad u kordhay tan iyo wixii ka danbeeyay markii ay tallada la
wareegeen.
Laakiin haddana dhinaca kale marka la eego
toddobaadyadii ugu danbeeyay dowladda waxaa soo food saaray caqabado waaweyn
uga imanayay dhinaca ciidamada oo sheegay in muddo ku dhan Afar bilood aysan
helin wax mishaar ah, waxaana ugu danbeeyay ciidamada naafadda xoogga dalka
Soomaaliyeed oo maalintii shalay dibadbax ka hor dhigay xarunta madaxtooyada
Soomaaliya.
C/raxmaan Diini,
Hiiraan Online
[email protected]
