Sabti, April, 27, 2019 (HOL) –
Shirkadda Isgarsiinta ee Hormuud Telecom ayaa ku soo bandhigtay magaalada
Muqdisho Deeqo Waxbarasho oo ay ka faa’iideyan doonaan Ardayada Soomaaliyeed ee
dhammeysa dugsiyada sare ee dalka.
Ujeedka Barnaamijkan deeqda Wax-barasho
ee Hormuud Telecom ayaa ah in ay kaqayb-qaadato kor u qaadidda iyo
kobcinta aqoonta ardaya Soomaaliyeed ee dhammeysta dugsiyada sare, deeqda
waxbarasho ee ay soo bandhigay Hormuud ayaa ah heer jaamacadeed iyada oo guud
ahaan ardayda dhammeysa dugsiyada sare ay kaqaybgeli karaan islamarkaana heli
karaan deeqadan waxbarasho, ardayada buuxisa shuruudaha ku xiran helidda
deeqadan ayaa ah kuwa sida buuxda uga faa’iideysan doona deeqda waxbarasho.
Madaxa Hey’adda Hormuud
Telecom Foundation oo ah garabka shirkadda Hormuud u qaabilsan Gargaarka Bani’Aadanimada
Cabdullaahi Nuur Cismaan oo Daah-furay munaasabadda looga dhawaaqayey Deeqdan
wax barasho ayaa ku dhawaaqay in 120 Arday oo heerka 1aad ee jaamacadda ah ay
ka faa’iideysan doonaan Deeqdan waxbarasho Sanadkasta, wuxuuna sharraxay habka
loo qaadanayo ardayda ka faa’iideysaneysa deeqaha wax-barahso ee Hormuud,
isagoo sheegay in imtixaan lagu gelayo 11 maaddo, kaas oo ay ka qayb-gelayaan
labada boqol ee Arday ee ugu sarreysa imtixaanka shahaadiga ee dugsiga sare
iyada oo dufcadda ugu horreysana laga qaadan doono tiradaas labada boqol ah.
Soo bandhigga Barnaamijkan
deeqda waxbarasho ee Hormuud waxaa kaqaybgalay Wasiirro, Xildhibano,
agaasimayaal, gobolka Banaadir, culimo, ganacsato, ururada bulshada iyo
marti badan oo kala duwan
Basma Caamir guddoomiye ku
xigeenka arrimaha bulshada ee gobolka Banaadir oo ka hadashay munaasabadda ayaa
sheegtay in ay Barnaamijka deeqada waxbarasho ee Hormuud uu yahay mid muhiimad
gaar ahaaneed u leh dadka Soomaaliyeed ayna gobol ahaan dhiirrigelinayaan
shaqada iyo howlgalka Hormuud, waxa ay sheegtay u soo jeedisay Hormuud in
ardayada aan helin waxbarashada heerka jaamacadda ee kaqalin jebisay dugsiyada
sare xilli hore ay muhiimad gaar ahaaneed siiso Ardaydaas.
Jawaahir Baarqab oo kuhadashay
magaca haweenka gobolka Banaadir ayaa sheegtay in ay haween ahaan aad ugu
faraxsan tahay kaalinta horumarinta waxbarashada iyo soo bandhigidda
Barnaamijka deeqada waxbarasho oo ay sheegtay in ay door muhiim ah ka qaadan
doonto dhiirrigelinta waxbarashada dugsiga illaa Jaamacadda.
Guddoomiyaha shirkadda Hormuud
Cabdikariin Kaariye ayaa sheegay in barnaamijkan deeqda waxabrasho uu
qayb ka yahay barnaamijyada lagu taakuleynayo laguna taageeryo dadka iyo dalka
Soomaaliyeed, isaga oo kahadlayey dhinaca dumarka ayuu sheegay in dhammaan
xarumaha waaweyn ee Hormuud ay dumarku ka shaqeeyaan isaga oo xusay in 158 qof
oo ah shaqaale ka geeriyooday ama ka duqoobay Hormuud kuwaas oo lagu
beddelay dad ay keensadeed qoyskoodu ay 42 kamid ah ay yihiin dumar.
Cabdikariin Kaariye
Guddoomiyaha shirkadda Hormuud ayaa kasheegay munaasabadda in tayeynta iyo
hagaajinta jaamacaduhu ay dabooli karto baahida guud ee dhinaca waxbarashada
kahaysata guud ahaan dalka.
Eng Cabdi Cashuur Xasan
wasiirka Wasaaradda Boostada, Isgaarsiinta iyo teknoolajiyadda ayaa sheegay in
Hormuud Telecom ay kadhabeysay magaca ay sidato ee Isgaarsiineed isaga oo
weydiistay Hormuud in dhallinyaro badan oo halabuur iyo waxbarasho fiican leh
ay la’yihiin meel ay kusoo bandhigaan hal-abuurkooda sidaas awgeedna ay u
baahan yihiin dhismaha meel ay kusoo bandhigaan hal-abuurkeeda, isaga oo
kudhiirrigeliyo shirkadaha kale in Hormuud tusaale u noqoto si iyaguna ay
kaalintooda u qaataan.
C/raxmaan Diini,
Hiiraan Online
[email protected]
.