Dacwad ka dhan ah madaxweynaha Hirshabeelle iyo ku-xigeenkiisa oo loo gudbiyay maxkamada sare ee dalka
Jimco, April, 26, 2019 (HOL)- Dr Xusseen
Cismaan Cilmi oo horay Wasiirka Xannaanada Xoolaha uga soo noqday maamulka Hir-shabeelle
ayaa sheegay in xubno gaaraya 11 Wasiirro horay uga soo noqday maamulka
Hir-shabeelle dacwad ka gudbiyeen sida uu hadalka u dhigay madaxweynaha
Hirshabeelle iyo ku-xigeenkiisa.
Wuxuu sheegay in dacwadooda oo soo martay
heerar kala duwan ugu danbeyntii u gudbiyeen guddoonka maxkamada sare ee dalka,
islamarkaana maalinta Isniinta ah la guda-gali doono.
‘’Dacwadeennu waxey ku saleysan tahay xuquuq
naga maqan, waa mishaarkii aan xaq u laheyn, mudaddaa intaa la eg Wasiirka waxaa ka maqan lacag dhan $200 oo dollar oo mishaarkiisa ah, wasiiru-dowlaha iyo Wasiir ku-xigeenkana waxaa ka maqan lacag dhan $1500 oo dollar bishiiba oo mishaarkiisa ah, waana mudo 15 bilood ah, waxaan rajey-nayaa in dacwadaasi aan ku guuleysan
doonno, waayo annaga waxa aan raadineyno waa xaquuq aan leenahay ‘’ ayuu yiri
Wasiirkii hore ee xannaanada Xoolaha ee maamulka Hir-shabeelle.
Waa markii ugu horeysay oo maxkamada sare ee
dalka loo soo gudbiyo dacwad ka dhan ah madaxda maamul gobolleedyada dalka oo la xiriirta mishaar la'aan iyo xuquuq la lusaday.
Marka laga soo tago sheegashada Wasiirka ee ah
in maxkamada sare ay u gudbiyeen dacwada ka dhanka ah madaxweynaha maamulka
Hirshabeelle iyo ku-xigeenkiisa, dhinaca kale ma jirto cid kale oo warbaahinta
u xaqiijisay jirintaanka dacwadan gaar ahaan maxkamada sare oo aan wax war ka soo
saarin.
C/raxmaan Diini,
Hiiraan Online
[email protected]
