Ciidamada dowladda oo agabka dhismaha iyo raashin gaarsiiyay deegaanno laga saaray Al-shabaab
Khamiis, April, 25, 2019 (HOL)- Ciidamada
sida gaarka ah u tababaran ee dowladda Soomaaliya [Danab] ayaa markii ugu
horeysay waxaa ay deeq isugu jirta qalabka dhismaha iyo raashin gaarsiiyeen
deegaanno laga saaray Al-shabaab oo ka tirsan gobolka Shabeellaha hoose.
Mowliid Axmed Xassan oo ah
afhayeenka ciidamada Danab ayaa sheegay in gaarkan ay gaarsiiyeen deegaannada
laga saaray Al-shabaab ee gobolka Shabeellaha Hoose uu noqonayo mid muhiim u ah
dib u soo kabashada nolasha dadka deegaannadaasi ku dhaqan.
‘’Marka laga soot ago deeqda
isugu jirta qalabka dhismaha iyo raashinka sidoo kale waxaan ka furnay
deegaanka xarun caafimaad oo siineysa dadka taagta daran adeeg-yada caafimaad
oo ay u baahan yihiin’’ ayuu yiri afhayeenka ciidamada.
Dhawaan madaxweynaha dowladda
Soomaaliya Maxamed Cabdullaahi Farmaajo ayaa booqday deegaannada Sabiid iyo
Canoole oo ka tirsan deegaannadii ugu danbeeyay ee laga saaray Ururka
Al-shabaab, isaga oo ugu baaqay ciidamada in ay gacan siiyaan dadka
deegaannadaasi ku dhaqan dowladdu –na ka caawineyso taageeradda ay u baahan
yihiin.
‘’Waxaan ku tala jirnaa oo ay
dadku naga codsadeen markii aan la sheekeysanay in aan u furno Iskuul
waxbarasho, madaama deegaannadasi aysan laheyn wax Iskuul ah ‘’ ayuu hadalkiisa
sii raaciyay Mowliid Axmed Xassan.
Qeyb ka mid ah gobolka
Shabeellaha hoose waxaa wali ka soconaya howlgalo ciidamada ay kula
dagaalamayaan Ururka Al-shabaab.
C/raxmaan Diini,
Hiiraan Online
[email protected]
