Axad, April, 21, 2019 (HOL) –Wararka
naga soo gaaraya gobolka Shabeellaha hoose ayaa sheegaya in galinkii danbe ee
shalay Qarax miino ciidamo ka tirsan dowladda Soomaaliya lagula eegtay qeybo ka
mid ah gobolka.
Inta la xaqiijinayo Labo askari
oo ka tirsan ciidamada dowladda ayaa ku geeriyooday qarax miino loogu aasay
wadada meel dulleedka ah deegaanka lagu magacaabo Sabiid ee gobolka Shabeellaha
hoose sida ay warbaahinta u sheegeen dadka deegaanka.
Qaraxa ayaa la sheegay in uu
qabsaday gaari nooca dagaalka oo ay la socdeen ciidamada dowladda kuwaa oo ku
sii jeeday xaro tababar uu uga socday ciidamo kale oo ka tirsan dowladda
Soomaaliya.
Sidoo kale waxaa la sheegayaa in ciidamo ka tirsan Milateriga oo ku
sugan deegaanka Sabiid lala eegtay qarax miino, xilli ay ku guda jireen
dhaq dhaqaaqyo ciidan, lama soo sheegin khasaaraha soo gaaray.
Ilaa iyo hadda ma jiro wax war ah
oo ka soo baxay dhinaca saraakiisha Laamaha Amniga oo la xiriira qaraxa lala
eegtay ciidamada dowlada.
Madaxweyne Farmaajo ayaa maalin
hor booqday qeybo ka mid ah gobolka Shabeellaha hoose, isaga oo ciidamada ku
booriyay in ay sii wadaan dagaalka ka dhanka ah Al-shabaab.
C/raxmaan Diini,
Hiiraan Online
[email protected]
