Dowladda oo diyaarisay ciidamada rabshadaha ka hortaga iyo dibadbax laga cabsi qabo maalinta berri ah
Arbaco, April, 17, 2019 (HOL)– Dowladda
Soomaaliya ayaa markii ugu horeysay maanta magaalada Muqdisho ku soo bandhigtay
ciidamada gaarka ah ee ka hortaga rabshadaha iyo dibadbaxyada, iyadoo dhan kalana
maalinta berri ah laga cabsi qabo dibadbax ballaaran oo ka dhaca magaalada
Muqdisho.
Baraha ay bulshadu ku wada xiriiraan gaar ahaan
Facebook –ga ayaa saacadihii la soo dhaafay waxaa qabsaday fariimo ay isku
dirayaan dadka oo isugu baaqay ka soo qeybgalka dibadbax ballaaran oo looga soo
horjeedo dowladda Soomaaliya kaa oo maalinta berri ah sida lagu sheegay
qoraalada ka dhacaya Muqdisho.
Lama oga ilaa iyo hadda cidda leh abaabulka
dibadbaxan lagu baaqay hasse ahaatee siyaasiga Salaad Cali Jeelle oo shir jaraa’id
xalay ku qabtay magaalada Muqdisho ayaa ku eedeeyay mucaaradka dowladda in ay
arintan gadaal ka riixayaan.
Walaaca laga qabo fal calinta ka dhalan karta
haddii ay dibadbaxyadan dhacaan ayaa sidoo kale ah arin bulshada walwal ka
muujineyso.
Dadka qaar ayaa dibadbaxyadan lagu baaqay ku
sheegay in ay yihiin kuwo nabdoon oo looga soo horjeedo oo kaliya tacadiyada ay
ciidamada u geystaan shacabka, gaar ahaan Dhalinyarada bajaajta ku shaqeysata,
oo bilihii la soo dhaafay ay ciidamada toogasho ku dileen dhalinyaro badan.
Muqdisho oo markii horeba magan u aheyd qaraxyo
iyo dilal qorsheysan ayaa hadda la oran karaa waa ugu biiraya dibadbaxyo aan
horay looga baran oo shacabku ku muujinayaan dareenkooda, si la mid ah kii
dhacay Sabtidii aynu soo dhaafnay oo ay ku dhinteen in ka badan 6 ruux oo shacab
ah.
C/raxmaan Diini,
Hiiraan Online
[email protected]