Madaxweyne Farmaajo ‘’ Caqabado waaweyn ayaan kala kulannay tirakoobka ciidamada
Jimco, April, 12, 2019 (HOL) –Madaxweynaha
dowladda Soomaaliya Maxamed Cabdullaahi Farmaajo oo ka hadlay tirakoobka
ciidamada qalabka sida ayaa sheegay in muddadii ay dib u habeynta ciidamada ku
jirtay dowladdiisu ay soo wajaheen caqabado aad u waaweyn.
‘’Tirakoobku waa is badal,
isbadalku-na dadka ma jacla, sidaa daraadeed caqabado ayaa naga soo food
saartay, laakiin hadda sidii aan u soo jiitameynay, waxaan soo gaarnay marxalad
aan ognahay tirada ciidamada aan heysanno’’ ayuu yiri madaxweynaha dowladda
Soomaaliya oo maalintii shalay khudbad ka jeedinayay munaasabada aas-aaska
ciidanka xoogga dalka Soomaaliyeed.
Wuxuu sheegay in ay aad uga
fikirayeen intii lagu guda jiray howsha tirakoobka waxa ka iman kara iyo
caqabadaha soo ifbixi kara isaga oo yiri’’ Maalin walba iyo bil walba dib ayaan
u dhigeynay tirkoobka Annaga oo is leh amaa si kale loo qataa… ciidanku amey
gadoodaan.. iyo waliba arrimo kale dhaci karay dartood..xitaa waxaa dhib noqotay in
ciidanka loo sameeyo Account si mishaarkooda loo siiyo’’ ayuu yiri
madaxweyne Farmaajo.
Dowladda madaxweynaha ka yahay Maxamed Cabdullaahi Farmaajo ayaa toddobaadyadii ugu
danbeeyayba u muuqatay mid wajaheysa caqabado waaweyn oo uga imanayay dhinaca
ciidamada oo qeybo badan oo dalka ka mid ah ka sameeyay gadood ay uga
cabanayaan in muddo ka badan Afar bilood aysan heli wax mishaar ah.
Laakiin madaxda ugu
sareysa Qaranka ayaa arintaa uga fal celiyay in ciidamada gadoodka sameynaya
yihiin kuwo aan u diiwaan-gashneyn Wasaarradda Gaashaandhigga, balse uusan
jirin askari la diiwaan-galiyay oo aan wax mishaar ah qaadan.
C/raxmaan
Diini, Hiiraan Online
[email protected]
