Khamiis, April, 11, 2019 (HOL)- Madaxweynaha dalka Sudan, Cumar Xasan
Al-Bashiir ayaa is-casilay kadib ku dhowaad afar bilood oo dibad-baxyo looga soo
horjeeday xukunkiisa 30-ka sano, sida ay werinayaan wakaaladaha wararka.
AP iyo Reuters ayaa labaduba qoray inay ilo-wareedyo ka tirsan dowladda ka
ogaadeen in Al-Bashiir oo 75 jir ah uu xilka ka degayo, islamarkaana ay socdaan
wada-tashiyo la xiriira sidii loo dhisi lahaa gole ku meel gaar ah.
Warbixinada ku saabsan is-casilaadda Al-Bashiir ayaa yimid saacado kadib
markii taleefishinka dowladda uu sheegay in ciidamada ay maanta ku dhowaaqi
doonaan “war muhiim ah” base aan bixin faah-faahin.
Kumanaan ka mid ah dadka magaalada Khartoum ayaa kusoo qul-qulay waddooyinka
ayaga oo u dhaqaaqay xarunta ciidamada milatariga, halkaasi oo dibad-baxayaasha
ay hor degenaayeen tan iyo sabtidii.
Ugu yaraan 22 qof ayaa lagu dilay isku dhacyo dhex-maray ciidamada iyo dibad-baxayaasha,
sida ay sheegaan kooxaha u dhaqaaqa bulshada.
Waxaa jira warar sheegaya in gaadiika ciidamada ay hareeyeen madaxtooyada,
oo ku dhex-taalal xarunta ciidamada.
Reuters iyo AFP ayaa sidoo kale weriyey in askarta ay weerareen xarunta
xisbiga Al-Bashiri ee talada haya.
Dibad-baxyada Sudan ayaa billowday 19-kii December 2018, markaasi oo qaar ka
mid ah shacabka ay dowladda Al-Bashiir ku eedeeyeen inay si xun u maareysay
dhaqaalaha dalka, taasi oo sababtay sare kac ku yimid qiimaha cuntada iyo shidaalka.
VOA