Khamiis, April, 11, 2019 (HOL) – Magaalada
Khartuum waxaa albaabada loo laabay oo aan la ogoleyn in ay shaqeeyaan
garoomada diyaaradaha, iyadoo uu soconayo howlgal weyn oo ay wadaan militariga
oo gudaha u galay Hoyga Madaxweynaha Sudaan Cumar Al-Bashiir.
Wararku waxaa ay sheegayaan in ciidamada
militarigu la wareegeen xarunta Telefishinka iyo Raadiyaha Qaranka, waxaana ay
sheegeen in dhawaan ay shaacin doonaan war wanaagsan.
Rasaas u muuqata dabaal deg ayaa laga maqlayaa
bartamaha magaalada Khartuum oo ay ridayaan ciidamada militari oo ku dhax jiray
shacabka dibadbaxa dhigaya.
Saxafiyad magac ku leh dalka Suudaan oo ku sugan magalada caasimadda ah ee
dalka Khartuum ayaa Twitterka ku soo qortay in ay jiraan warar sheegaya in
masuuliyiin sare oo dawladda ah la xirxiray, garoonkii diyaaradahana albaabada
loo laabay.
Mudaaharaadayaasha
ayaa barnaamijka Newsday ee BBC-da u sheegay in dadku ay ku damaashaadayaan
waddooyinka magaalada caasimadda ah ee Khartuum ee dalka Suudaan.
Lama oga ilaa iyo hadda xaalka madaxweynaha dalka
Cumar Al-Bashiir walina si cad looma sheegin madaxweynuhu xukunka ka degay iyo
in kale.
C/raxmaan Diini, Hiiraan
Online
[email protected]
