Arbaco, April, 10, 2019 (HOL)- Illaa 27 goobood oo dhuxulaysato ku
gubayeen dhirta ayaa la baabiiyey kadib kacdoon ka yimi bulshada degmada
Xuddun.
Ololahan lagula dagaalamayo
dhuxulaysatada ayaa waxaa sida uu HOL u sheegay Isuduwaha Wasaarada Degaanka ay
iska kaashanayaan bulshada degmada Xuddun wasaarada iyo ciidanka saldhiga
Sideedaad.
"Waxaan hada ku guulaysan inaan
baabiino ku dhowaad Sodon hogood, waxaana noo qorshaysan in aan wadno illaa aan
ka suurino kuwa isu bahaystay xaalufka dhulka" sidaa waxaa yidhi Jaamac
Maxamuud Xay Isu-duwaha Wasaaradda deegaanka ee gobolka Sool oo ku sugan
magaalada Xuddun.
Qaar ka mid ah waxgaradka degmada
Xuddun oo hawshan wax ka wada ayaa sheegay in dhibaatada reer guuraaga haysata
ay sabab u tahay xaalafka dhuxulaysatada, waxaanay u mahad celiyeen ciidnka
degmada degan oo la'aantood aan hawlgalkan u suuroobeen.
Sanadkii 2011kii ayaa ololahan oo
kale uu sameeyey Madaxweyne ku Xigeenka Puntland Axmed Cilmi Cismaan
"Karaash" taas oo mudo lagaga nastay dhuxulaysatada.
Ma jirto cid loo xidhay hawshan oo
illaa hada la sheegay balse khasaaraha agabka ay adeegsanayaan ayaa loo arkaa
in uu ku filan yahay oo aanay ku noqon karin maadaama aysan ahayn shirkad
dhaqaale haysata.
Seynab Cabdi Warsame
Laascaanood G. Sool