Shirka Garoowe ee golayayasha hay'adda sharci dajinta dalka oo maanta la soo gabagabey-nayo
Arbaco, April, 10, 2019 (HOL) – Waxaa lagu wadaa
in maanta Arbaco ah maagalada Garoowe lagu soo geba-gabeeyo shirka Goleyaasha Sharci-dejinta
dalka oo ay ka qeyb galayaan Guddoomiye kuxigeenka 2aad ee Golaha Shacabka iyo
guddoonada Baarlamaanada, Jubbaland, Puntland, Koonfur Galbeed iyo
Hir-Shabeelle, iyada oo Galmudug ay ka maqan tahay.
Shirka oo noqonaya kii shanaad ayaa Isniintii ka
furmay magaalada Garoowe,waxaana shalay oo Talaado aheyd talooyinkooda
looga dhageystay Guddoomiyaasha Golayaasha Xeer dejinta ee dowladaha xubnaha ka
ah Dowladda dhexe, waxaana Guddoomiyaha Golaha Wakiiladda Puntland
Cabdixakiin Maxamed Axmed “Dhoobo” uu sheegay in Muhiim ay tahay loona
baahanyahay in wada shaqeyn dhow ay yeeshaan gudiyada isku shaqada ah ee
Golayaasha xeer dejinta.
Guddoomiyayaashii ka qeybgalaya shirka ayaa
balanqaaday in ay sii xoojin doonaan wada shaqeynta iyo iskaashiga Dowladda
dhexe iyo Dowladda Goboleedyada si shacabka oo dhan ay dowladnimada u
gaarto.
Guddoomiye ku-xigeenka labaad ee Golaha Shacabka
Mudane Mahad Cabdalla Cawad ayaa isna sheegay in ka gole shacab ahaan diyaar u
yihiin in shuruuc walba oo dalka loo sameynaayo laga tala geliyo Dowlad
Goboleedyada.
Maanta ayaa ugu danbeyntii la filayaa in shirka
laga soo saaro Warmurtiyeed ay ku heshiiyeen xubnihii ka qeyb galay shirkaas ee
ka socday dowladda Federaalka iyo Dowlad goboleedyada.
C/raxmaan Diini,
Hiiraan Online
[email protected]