Maxaa ka jira in Booliiska Soomaaliya shaqo joojin ku sameeyay hay’adda Aamin Ambulance
Arbaco, April, 10, 2019 (HOL) – Waxaa
sii xoogeysanayay saacadihii ugu danbeeyay wararka ku saabsan shaqo joojin
Booliiska Soomaaliya ay ku sameeyeen hay’adda gurmadka degdega ah ee Aamin Ambulance
oo ka mid ah hay’addaha gargaarka deg dega ah u fidiya dadka gaar ahaan marka ay
dhacaan qaraxyada.
Madaxtooyada Soomaaliya iyo
taliska Booliiska Soomaaliyeed oo labaduba ka hadlay warka ku saabsan shaqo ka
joojinta hay’adda Aamin Ambulance labaduba waxaa ay sheegeen in uusan jirin
warka ku saabsan in uu taliska Booliiska Soomaaliyeed shaqo joojin ku sameeyay
hay’addan oo siweyn caan uga dhax ah bulshada kana soo shaqeyneysa howlaha
samafalka muddo ka badan 12 sano.
Laakiin madaxda Aamin Ambulance
oo la hadlay warbaahinta ayaa sheegay in Booliisku ku soo wargaliyeen inay joojiyaan
shaqada, taasoo uu ku tilmaamay arrin aan wanaagsaneyn.
‘’Waxey noo sheegeen in aan
shaqada joojinno oo aan tagin goobaha ay qaraxyadu ka dhacaan si dadka loogu
gargaaro, waana arin nasiib darro ah ‘ ayuu yiri Dr. C/qaadir C/raxmaan Xaaji
madaxda Aamin Ambulance.
Taliye ku-xigeenka Booliiska
Soomaaliyeed Zakiya Xusseen Axmed ayaa dhankeeda sheegtay in uusan jirin amar
ka soo baxay Booliiska oo shaqada looga joojiyay hay’adda Aamin, taa
badalkeedna hay’addaha Amnigu diyaar u yihiin wada shaqeyn dhaw oo lala yeesho
hay’adda si looga gacan siiyo howlaheeda gurmadka degdega ah.
Sidoo kale warka arintan ku
saabsan waxaa beeniyay agaasimaha war-faafinta madaxtooyada Soomaaliya
Cabdinuur Axmed Maxamed oo sheegay in uu been abuur yahay warka ku saabsan
taliska Booliisku shaqo joojin ku sameeyay Aamin Ambulance.
Laakiin dad ayaa su’aalo badan
iska weydiinaya cid bixisay amarka shaqo joojinta ah mar haddii taliska
Booliiska iyo madaxtooyada Soomaaliya labaduba sheegeen in uusan jirin warka
arintan ku saabsan.
“Amarka nala siiyay wuxuu ahaa inaan shaqada
joojin oo hadal ahaan Booliska nagu dhaheen, in meelaha qaraxyada ka dhacaan
aanan tagi karin, markii aan ka codsanay warqad in nala siiyo waxay dhaheen
warqad nalooma keenin”ayuu yiri Madaxa Gaadiidka Aamin Ambulance.
Hay’adda gurmadka deg dega ee Aamin Ambulance
ayaa ah mid si gaar ah loo leeyahay,waxaana ay ka Shaqeysaa u gurmashada dadka
ku waxyeelooba qaraxyada iyo musiibooyinka kale ee ka dhaca magaalada Muqdisho.
C/raxmaan Diini,
Hiiraan Online
[email protected]