Khamiis, September, 06, 2018
(HOL) – Golaha deegaanka degmada Boosaaso ee
xarunta gobolka Bari ayaa doortay duqa degmada iyo ku-xigeenkiisa,doorashada
ayaa ka saartay magaalada ganacsiga ah maamul kumeel-gaar ah oo muddo
shaqeynayay.
Labo musharrax ayaa ku tartamay duqa
degmada, waxaana 28 cod ku guuleystay,Cabdisalaan Bashiir Cabdisalaan oo
noqonaya duqa cusub ee degmada, halka musharraxa kale ee xilkan kula tartamayay
,Maxamed Mire uu ka helay golaha deegaanka 3-cod , guddiga doorashada
ayaana ku dhawaaqay natiijada.
Xildhibaannada golaha deegaanka
waxaa kalo ay isla maanta doorteen ku-xigeenka duqa degmada, waxaana xilka ku
guuleystay Cabdiraxmaan Maxamed (Garoon) kaasoo helay 26 cod halka musharrixii
la tartamayay Mubaarak Salaad Cali uu isagana helay 5 cod, iyadoo markiiba la
dhaariyay maamulka cusub ee degmada.
Guddoomiyaha cusub ee degmada
Boosaaso,Cabdisalaan Bashiir Cabdisalaan oo xilkan heynaya shanta sanno ee soo
socota , wuxuu horey uu u ahaa sii haya duqa magaalada Boosaaso, kaddib markii
madaxweynaha Puntland, Cabdiweli Gaas uu kala direy golaha deegaanka Boosaaso
bishii March ee sannadkan.
Iman Mohamed Jama,Hiiraan Online