9/20/2018
Today from Hiiraan Online:  _
Wararka Maanta- Khamiis, Sept 6 , 2018
Hooyada dhashay madaxweynihii hore ee DDSI oo codsatay in la sii daayo wiilkeeda


 

Khamiis, September, 06, 2018 (HOL) – Hooyada dhashay madaxweynihii hore ee dowlad deegaaanka Soomaaliyda Itoobya Cabdi Maxamuud Cumar oo magaceeda ku sheegtay Diid Mahad Caloow ayaa ka dalbatay bulshada Soomaaliyeed in ay u gurmadaan wiilkeeda Cabdi Maxamuud Cumar oo sida sheegtay xabsiga ku dhax xannuunsanaya.

Fariin ay soo dhigtay baraha bulshada ayeey uga codsatay bulshada Soomaaliyeed ee ku dhaqan dowlad deegaanka iyo xukuumadda uu hoggaamiyo Abiy Ahmed in wiilkeeda leyska cafiyo, lagana sii daayo xabsiga uu ku jiro.

“Magaceygu waa Diid Mahad Colow, waxaan ahay madaxweynihii hore ee dowlad deegaanka Cabdi Maxamuud Cumar Hooyadii, waxaan idinka codsanayaa dhammaan Soomaali Maxamed meel walba oo ay joogto cid kasta oo wax ka tirsaneysa Cabdi Maxamuud Cumar in uu dar ilaahey u saamaxdo, ayeey tiri Hooyada dhashay madaxweynihii hore Cabdi Maxamuud Cumar.

Waxey sheegtay in hadda uu ku jiro sida uu ay hadalka u dhigtay gacan cadaw, oo ay ula jeeday markaa gacanta xukuumadda dhexe ee Itoobiya oo xirtay Cabdi Maxamuud Cumar.

Ra’iisul Wasaaraha dalka Itoobiya Abiy Ahmed ayeey ugu baaqday in uu ka qeyb qaato sii deynta wiilkeeda, maadaama uu ku jiro gacanta dowladda uu isaga madaxda ka yahay.

Cabdi Maxamuud Cumar ayaa 27-kii August ee sanadkan lagu xiray xabsi ku yaalla magaalada Addis Ababa, kadib markii gurigiisa ay ka soo kaxeeyeen ciidamada federaalka Itoobiya.

C/raxmaan Diini, Hiiraan Online
[email protected]







Click here
9/6/2018 11:50 PM EST
Khamiis, September, 06, 2018 (HOL)–Waxaa maanta Xarumaha Jaamacadda Benaadir ee magaalada Muqdisho ka bilowday imtixaanka ogolaan-shaha ama Qubuulka ee Jaamacadaas ee sanad dugsiyeedka 2018-2019 kaasoo ay u fariisteen sanadkan ardaydii ugu badneyd.

9/6/2018 2:30 PM EST
Khamiis, September, 06, 2018 (HOL)– Madaxweynaha Jamhuuriyadda federaalka Soomaaliya Maxamed Cabdullaahi Maxamed (Farmaajo) ayaa maanta dib ugu soo laabtay dalka, kadib shirkii Saddex geesoodka ahaa ee uu kaga qeyb galay magaalada Asmara, kaasi oo u dhaxeeyay Madaxweynayaasha Soomaaliya, Eritrea iyo Ra’iisul Wasaaraha Itoobiya.

9/6/2018 10:12 AM EST
Khamiis, September, 06, 2018 (HOL)–Saddexda Wasiirro arrimo dibedeed ee dalalka Soomaaliya, Itoobiya iyo Eritrea ayaa gaaray dalka Jabuuti, kaddib shir madaxeedkii maalintii shalay magaalada Asmara ku dhaxmaray madaxweynayaasha saddexda wadan.

9/6/2018 8:48 AM EST
Khamiis, September, 06, 2018 (HOL) – Koox budhcad ah ayaa xallay fiidkii Gaadhi nooca xamuulka qaada oo ay leedahay shirkadda Oomaar ku afduubteen bariga magaalada Hargeysa, kuwaas oo lala baxsaday.

9/6/2018 8:28 AM EST
Khamiis, September, 06, 2018 (HOL)–Golaha deegaanka degmada Boosaaso ee xarunta gobolka Bari ayaa doortay duqa degmada iyo ku-xigeenkiisa,doorashada ayaa ka saartay magaalada ganacsiga ah maamul kumeel-gaar ah oo muddo shaqeynayay.

9/6/2018 6:31 AM EST
Khamiis, September, 06, 2018 (HOL)–Wasiirka waxbarashada xukuumadda federaalka Soomaaliya mudane Cabdulahi Goodax Barre ayaa kulan ka qaatay madaxa waaxda horumarinta adeegga bulshada midowgga Yurub gaar ahaan Soomaaliya Mr, Olivier Louis.

9/6/2018 3:43 AM EST
Khamiis, September, 06, 2018 (HOL)–Labo Qof ayaa ku dhintay dagaal la sheegay inuu hada ka socdo deegaanka Dan-dan oo hilaadii 40km dhinaca koonfureed kaga beegan magaalada Laascaanood ee xarunta gobolka Sool.

9/6/2018 1:10 AM EST
Khamiis, September, 06, 2018 (HOL)–Guddoomiyaha degmada Xamar –Weyne Cumar Shariif Maye ayaa lagu soo oogayaa dacwad ka dhan ah in uu gafay Booliiska Soomaaliyeed iyo xukuumadda uu madaxda ka yahay ra’iisal wasaare Xassan Cali Kheyre.

9/6/2018 12:52 AM EST
Khamiis, September, 06, 2018 (HOL)-Madaxweynaha Maraykanka D. Trump ayaa wargeyska The New York Times ka dalbay inuu sheego magaca qof Aqalka Cad ka shaqeeya oo qoray maqaal uu wax kaga sheegay madaxweyne Trump.

9/6/2018 12:35 AM EST
Khamiis, September, 06, 2018 (HOL)-Dalalka Soomaaliya Itoobiya iyo Eritrea ayaa heshiis ku kala sixiixday magaalada Asmara ee caasimadda dalka Eritrea.