Isniin, September, 03, 2018 (HOL)- Maanta oo Isniin ah waxaa ka furmaya magaalada
Beijing shirka u dhaxeeya Shiinaha iyo Afrika ee (FOCAC) oo ay sanadkan ka qeyb
galayaan ku dhawaad madaxda 53 dal oo qaarraada ka tirsan.
Kulanka ayaa inta uu socdo waxaa lagu eegi doonaa
iskaashiga ganacsiga iyo maalgashiga, hiigsiyada cusub ee iskaashiga dhaqaale,
iyo dadaallada lagu xoojinayo xiriirka u dhexeeya Shiinaha iyo dalalka Africa.
Dhinaca Soomaaliya marka la eego kulanka waxaa ka
qeybgalaya wafdi uu horkacayo madaxweynaha dowladda Soomaaliya Maxamed
Cabdullaahi Farmaajo oo sidoo kale ay wehliyaan ganacsato Soomaaliyeed.
Inkastoo qodobada diirrada lagu saaray kulanka u bad-naan doonaan xiriirka
ganacsiga labada dhinac Shiinaha iyo qaarrada Africa iyo her-galinta mashaariic
hormarineed Soomaaliya shirkan waxaa ay uga faa’ideysan doontaa sidii ay u soo
jiidan laheyd idhaha dowladda Shiinaha marka laga eego dhanka fursadaha ganacsi iyo maalgashi ee ka jira
dalkeenna.
Madaxweyne Farmaajo oo maalmo ka hor gaaray
Beijing ayaa kulan gaar ah la qaatay Madaxweynaha Shiinaha, waxayna ka wada
hadleen dardar-gelinta xiriirka taariikhiga ah ee Shiinaha iyo Soomaaliya, kaas
oo ku saleysan iskaashi iyo wax wada qabsi, gaar ahaan dhinacyada ganacsiga,
maalgashiga, diblumaasiyadda iyo dhismaha kaabayaasha dhaqaalaha.
Sidoo kale madaxweynaha Soomaaliya iyo wafdiga la
socda ayaa inta ay joogaan Shiinaha kulamo gaar gaar ah la qaadan doona qaar ka
mid ah madaxda qaarradda ee kulanka ka qeyb-galiya.
C/raxmaan Diini, Hiiraan Online
[email protected]