Talaado, September, 11, 2018
(HOL)– Golaha wasiirrada Puntland ayaa
hadda ku shirsan xarunta madaxtooyada Puntland ee dulleedka magaalada
Garoowe,kulankan oo saraakiisha ay ku tilmaameen mid aan 'caadi ahayn' waxaa
guddoominaya madaxweynaha Puntland Cabdiweli Gaas.
Kulankan waxaa kalo ka qaybgelaya
madaxweyne ku-xigeenka Puntland,arrimaha diirrada lugu saarayo waxaa ka mid ah
in golaha uu ka dooddo go’aankii hoggaamiyayaasha madasha wadatashiga
dowlad-gobolleedyada ay xiriirka ugu jareen dowladda Federaalka, qodob kale oo
la xiriira xaaladda gobolka Sool ayaa ka mid ah arrimaha kale ee kulanka looga
hadlayo.
" Shirkan deg dega ah waxaa ay
golaha uga hadlayaan arrimo xasaasi ah oo ay ugu horreeyso xaaladda siyaasadeed
ee dalka." ayuu yiri sarkaal goobjoog u ah shirka oo la hadlay Hiiraan
Online.
Warbaahinta ayaa dibad joog ka ah
kulanka, balse warar horu-dhaca ah oo laga helayo halka uu ka socda shirka ayaa
sheegaya in go'aamo kulanka laga soo saari doonno ay qeyb ka noqon karraan in
Puntland ay hakiso xiriirka ay la leedahay hay'adaha dowladda federaalka,sida
ay oggaatay Hiiraan Online.
Kulankan aan horey loo sii shaacin,
wuxuu ku soo aaday xilli khilaaf xooggan uu u dhaxeeyo dowlad-gobolleedyada iyo
dowladda federaalka, waxaana shir maalmo ka hor ku soo dhammaaday Kismaayo ay
si wadajir ah dowlad-gobolleedyada xiriirka ugu jareen dowladda dhexe ee
federaalka.
Iman Mohamed Jama, Hiiraan Online