Diyaarad ay soo dirtay dowladda federaalka oo dhaawacyo ka qaaday Garoowe iyo Gaalkacyo
Khamiis, October, 25, 2018 (HOL)
– Diyaarad nooca Fokker -50 oo
22 qof oo ka mid ah dadkii ku dhaawacmay dagaal beeleedkii toddobaadkan ka
dhacay deegaanka Dhumay ee gobolka Sool ka qaaday Garoowe iyo Gaalkacy ayaa
goor dhow gaartay magaalada Muqdisho.
Dowladda Soomaaliya ayaa markii ay
diyaarada gaartay Muqdisho waxay sheegtay inay u dirtay si ay u soo qaado dadka
qaba dhaawacyada culus.
Diyaarada marka ay ku sugneyd
Puntland looma ogalaan warbaahinta inay sawirro ka qaadan, sidoo kale wasiirro
iyo xildhibaanno dowladda federaalka ah oo diyaarada la socday oo caawa ku
hoyanaya magaalada Gaalkacyo markii ay diyaarada qaadi wayday ma jirto wax
hadal ah oo ay warbaahinta siiyeen.
Ku dhawaad 50 ruux oo ka mid ah
dadkii ku dhaawacmay dagaalka deegaanka Dhumay ayaa la soo gaarsiiyay
isbitaalada magaalada Gaalkacyo iyo Garoowe, kuwaas oo qaarkood dhaawacyo culus
qaba ,labo maalin oo dagaal uu ka dhacay deegaanka Dhumay oo 45 km xagga
koonfur galbeed kaga beegan magaalada Laascaanood , waxaa ku dhintay 80 qof ,
ku dhawaad boqol ruux ayaa sidoo kale ku dhaawacmay.
Iman Mohamed Jama, Hiiraan Online
