Arbaco, November, 07, 2018 (HOL) –Xaalad
cakirnaan siyaasadeed ah ayaa ka jirta magaalada Baydhabo ee xarunta gobolka
Baay, saacadihii ugu danbeeyay-na waxaa halkaa ka soconayay kulamo siyaasadeed
oo looga arinsanayo khilaafka ka dhashay doorashada madaxtinimada ee loo
ballansanaa 17ka bishan.
Maalin ka hor waxaa is casilay
kala bar guddiggii doorashada maamulka Koonfur Galbeed kuwaa oo eedeyn culus u jeediyay
dowladda Soomaaliya oo ay sheegeen in ay ka socon weyday doorashadii Koonfur
Galbeed, laakiin guddiggu arintaan iskuma raacsana oo waxaa jira qaar kale oo
ka soo horjeeda eedeyntaas iyo in dib loo dhiggo doorashada.
Hadda waxaa soo baxaya cadaadis
lagu hayo guddoomiyaha Golaha Baarlamaanka Koonfur Galbeed Cabduqaadir Shariif
Sheekhu-naa oo laga dalbaday in uu si deg deg ah u soo dhameystiro guddiga
doorashada si horay loogu sii wado hannaankii doorashada.
Odayaasha Koonfur Galbeed
laftirkooda iskuma waafaqsana xiisada siyaasadeed oo qaarkood ayaa qaba in
doorashadu waqtiggeeda ku dhacdo, halka kuwa kalana ka soo horjeedaa.
Wasaarradda arrimaha gudaha
dowladda Soomaaliya ayaa qoraal shalay ka soo baxay lagu sheegay in aan
doorashada dib loogu dhiggi karin waqtiggii loogu talagalay 17ka bishan,
waxaana ay wasaarraddu ugu baaqday mas’uuliyiinta maamulka Koonfur Galbeed in
la ilaaliyo hannaanka iyo sharcida habsami u socodka diyaarinta jadwalka
doorashada.
Shariif Xassan madaxweynaha
maamulka Koonfur Galbeed wali kama uusan hadal arrimahan dhacaya, laakiin bulshada
ku dhaqan magaalada Baydhabo ayaa ku eedeynaya in uu yahay maskaxda ka danbeysa
is casilaada guddigga doorashada, marar badan oo horena waxaa uu dowladda dhexe
u jeediyay eedeyn ah in ay faragalin ku heyso doorashada Koonfur Galbeed.
Lama oga halka looga dhaqaaqi
doono xaaladan imika taagan madaama 10 cisho uun ka harsan tahay waqtiga loo
qabtay in ay doorashadu ku dhacdo.
C/raxmaan Diini,
Hiiraan Online
[email protected]
