Isniin, May, 14, 2018 (HOL) – Ra’iisal wasaaraha
xukuumadda Soomaaliya Xassan Cali Kheyre oo la socdaan Wasiirka Amniga iyo
saraakiisha ciidamada Nabad-sugida ayaa xalay kormeeray qeybo ka mid ah
magaalada Muqdisho.
Ra’iisul wasaaraha Soomaaliya Xasan Cali Kheyre
ayaa xalay kormeer uu ugu kuur galayo xaaladda amniga ee Muqdisho ku soo maray
qaar ka mid ah degmooyinka Gobolka Banaadir iyo saldhigyada ciidamada.
Ra’iisul Wasaaraha ayaa meelihii uu tagay waxaa
ka mid ahaa degmada Kaxda, halkaasoo uu kula kulmay Guddoomiyaha degmadaas iyo
saraakiisha amniga.
Wasiirka Amniga Maxamed Abuukar Isloow Ducaale ayaa warbaahinta u sheegay in kormeeray uu qeyb ka yahay howlaha la xiriira sugida amniga iyo u
kuur gelida xaalada nabadgalyo ee caasimada.
Booqashada ra’iisal wasaaraha ee qeybo ka mid ah degmooyinka gobolka
Banaadir ayaa imaneysa xili ay nagu soo fool leedahay bisha Barakeysan ee
Ramadaan, islamarkaana dowladdu ku dadaaleyso sidii loo xoojin ahaa Amniga caasimada, madaama Al-shabaab kordhiyaan weerarradooda inta lagu guda-jiro
bisha Ramadaan.
C/raxmaan Diini,
Hiiraan Online
[email protected]