Jimco, May, 11, 2018 (HOL) – Wasiirrada Amniga gudaha Soomaaliya ayaa si
adag uga hadashay dilalka ka dhacay caasimada ee lagula kaco mas’uuliyiinta ka
tirsan dowladda iyo dadka rayidka, xili dhinaca kale ay nagu soo fool leedahay
bisha Barakeysan ee Ramadaan.
Wasiirka Amniga gudaha Maxamed Abuukar Ducaale Isloow ayaa sheegay in
magaalada Muqdisho xaq u laheyn in maalin walba lagu daadiyo dhiigga muwaadin
Soomaaliyeed, isaga oo intaa ku daray in ka wasaarad ahaan xoogga saari doonaan
sugida Amniga caasimada.
“Waxaan rabaa in aan halkan ka sheego
magaalada Muqdisho xaq uma lahan in maalin kasta ama habeen kasta lagu dilo qof
muwaadin ah, horayna waan u sheegnay hadana waan ku celinaynaa, waxaan u
dhaaranay inaan shacabka har iyo habeen u shaqeyno,” ayuu yiri Wasiir Islow.
Waxaa uu ku dhiiri-galiyay ciidamada dowladda ee loogu talagalay sugida
Amniga in ay kordhiyaan howlgalladooda lagu sugayo nabad-galyada, iyaga oo
dhinaca kalana si wanaagsan ula dhaqmaya dadka shacabka ah.
Hadalka Wasiirka ayaa imanaya xili xalay rag hubeysan afar ruux ku dileen
guri uu magaalada Muqdisho ka degenaa sarkaal ka tirsan hay’addaha
Nabad-sugida.
C/raxmaan Diini,
Hiiraan Online
[email protected]
