Xisbiga WADDANI oo heshiishka DP World ku tilmaamay mid madmadow badan ku jiraan
Isniin, Maarso, 05, 2018 (HOL) -Xisbiga
Mucaaradka ah ee WADDANI ayaa sharci daro ku tilmaamay heshiishkan saddex
geesoodka ah ee DP World la gashay Somaliland.
Gudoomiyaha
xisbiga WADDANI C/raxmaan Maxamed C/laahi Cirro ayaa sheegay in heshiishkani Dp
World uu mad madow badani ku jiro,isla markaana aan shacbiga loo soo bandhigin.
“Heshiishyada
xukumadihii kala dambeeyey ee xisbiga kulmiye la galeen dalka aanu jaarka
nahay ee Imaaraadka Carabta waxa ka muuqata madmadow faro badan ,
iyadoo shacbiga si dhab ah loogu soo bandhigin heshiishyadaasi, waxa ka marag
kacaya mugdisigaasi shirkad loogu magac daray Somaliland Investment
Company oo sharciga samayskeedu waafaqsanayn shuruucda Somaliland oo Dubai laga
sameeyey”ayuu yidhi Guddoomiye Cirro.
Sidoo
kale, Cirro waxa uu sheegay in heshiishkan cusub ka hor imanayo heshiishkii
hore ee Baarlamaanku ansixiyey, waxaanu sheegay in heshiishkaasi hore
Somaliland lahayd 35%, haseyeeshee kan dambe laga jaray 5%.
“Heshiiskaasi
hore ee aan rasmiga ahayn heshiishkan cusubi wuu burinayaa, heshiishkaasi
baarlamanka la hor geeyey Somalilad waxay lahayd saami dhan 35%, Dp Wolrd wuxuu
lahaa 65%, Somaliland may cadayn sababta 5% u bixisay iyo waxay ku
bedelatay”ayuu raaciyey hadalkiisa.
Dhinaca
kale, waxaa uu gudoomiyuhu ka hadlay mashruuca Xumbo Weyne oo dadweynuhu
sugayeen inay xaafadaha aan biyaha helin biyo heli doonaan, haseyeeshee
xukuumadan cusub sheegtay inuu mashruucaaasi fashilmay, waxa uu xisbigu sheegay
in loo cadeeyo sababta fashilkaasi keentay.
“60%
shacabka Somaliland waxay rajaynayeen inay biyoi helaan oo biyahaasi ka helaan
mashruucii Xumbo weyne, xukuumadihii kala dambeeyey rajo weyn bay shacabka
galiyey inay biyo heli doonaan, laakin xukuumadan cusub rajadii shacabka way ka
tirtirtay, xukuumadu ha u cadayso shacabka maxa fashiliyey, cidii lacagta
mashruucaasi xaday ha sheegto, cid baa dambi gashay ma odhan, dawladii
imaaraaadka ee mashruucan waday baa lacagtii la noqotay may odhan halkee buu
fashilku ka yimid”ayuu yidhi Cirro oo ka hadlayey mashruuc balaadhan oo biyo
balaadhinta Hargeysa loogu tallogalay oo la sheegay inuu fashilma, haseyeeshee
xukuumada ma cadeyn sababta uu u fashilmay iyo cidii dambiga lahayd.
Barkhad-ladiif M. Cumar, Hiiraan Online
[email protected]
Hargeysa, Somaliland
