Turkiga oo Darees ciidan ku wareejiyay taliska ciidamada militariga dowladda Soomaaliya
Isniin, Maarso, 05, 2018 (HOL) - Saraakiisha
ciidamada xoogga dalka ayaa guddoomay Darees ciidamada oo dowladda Turkigu ay
ugu talagashey Ciidamada Cirka iyo Badda oo ka mid ah ciidamada xoogga dalka
Soomaaliyeed, waxaana ay ka guddoomeen saraakiil kale oo ka socotay wasaaradad gaashaandhiga
dalkaasi Turkiga.
Dareeskan dowladda Turkiga ay ugu deeqday ciidamada Cirka iyo Badda Soomaaliya ayaa isugiu jiray Dhar,
Kabo iyo Agab kale oo labiska ciidamada la xiriira, kuwaasi oo qeyb ka ah
dadaalada ay dowladda Turkigu ay ku taageerayso ciidanka xoogga dalka.
Munaasabad kooban oo Dareeska loogu wareejinayay ciidamada xoogga dalka ayaa ka dhacay xerada tababarka Jasiira,
waxaana taliyaasha ciidamada Cirka iyo Badda Admiral Madey Nuurow Sheekh Ufurow
iyo Maxamuud Sheekh Cali Deble Baylood ay balan-qaadeen in ay u maareyn doonaan
sidii loogu talagalay.
“Maanta waxaan halkani ku guddoomaynaa Dareeskan oo dowladda Turkigu in
noogu deeqday, mana-ahan markii ugu horeysay,waa markii labaad oo deeq tan
lamid ah ay inoo keenaan waxaan dhihi karnaa waa cusub ayaa inoo baryay, Anagana
waxaan balan-qaadaynaa in aan u maareyno sidii loogu talagalay”.ayuu yiri
taliyaha ciidamada Cirka Maxamuud Sheekh Cali Deble Baylood
Abaanduulaha ciidamada xoogga dalka Soomaaliyeed Gen. C/llaahi Cali Caanood
ayaa uga mahad-celiyay dowladda Turkiga sida ay u garab taagan-tahay ciidamada
xoogga dalka Soomaaliyeed,isagoo ku tilmaamay mid dhiiro-gelinaysa ciidamada xoogga dalka.
Dowladda Turkiga oo ka mid ah saaxiibada Soomaaliya ayaa dowr muuqda ku leh
taageerada ay siinayso dowladda iyo shacabka Soomaaliyeed,sida hirgelinta
mashaariic horumarineed iyo taageeridda ciidamada Qalabka sida.
C/raxmaan Diini, Hiiraan Online
[email protected]
