Madaxweyne Farmaajo oo dib u dhigay kulan ay maanta yeelan lahaayeen xildhibaannada Golaha Shacabka
Sabti, Maarso, 31, 2018 (HOL)–War naga soo gaaray madaxtooyada Soomaaliya ayaa sheegaya in madaxweyne Maxamed Cabdullaahi Farmaajo uu baajiyay kulan xasaasi ah oo ay maanta yeelan lahaayeen xildhibaannada Golaha Shacabka.
Agaasimaha Madaxtooyada Villa Soomaaliya
Cabdinuur Maxamed Axmed ayaa xaqiijiyay in la hakiyay kulankii Baarlamaanka ee
maanta loo balansanaa, kaddib soo jeedin ka timid Madaxweynaha.
Wararka ayaa sheegaya kulanka loo
baajiyay si looga fogaado dhibaato ka dhalan karta fadhiga Golaha marka ay isugu taggi
lahaayeen xildhibaanno siweyn ugu kala
aragti duwanaa Ajandaha kulanka.
Xildhibaanno xalay ku shiray
magaalada Muqdisho ayaa ku eedeeyay madaxweynaha dowladda Soomaaliya in uu ku
guuldareystay waajibaadkii loo doortay, iyaga oo sheegay in mooshinkan bilaawday noqon doonin mid halkan ku
dhamaada ilaa sida ay hadalka u dhigeen uu madaxweynaha xilkiisa ku waayo.
Guddoomiye ku-xigeenka Koowaad ee
Golaha Shacabka Mahad Cabdalla Cawad ayaa sheegay in uu madaxweynuhu qeyb ka
yahay sida uu hadalka u dhigay weerarka lagu soo qaaday Baarlamaanka Soomaaliya
wax badanna ka ogyahay ciidamada la dul dhigay xarunta.
Laakiin dhinaca kale
xildhibaannada Mooshinka ka keenay guddoomiye Jawaari ayaa wali ku adkeysanaya in mooshinkii taagan
yahay lagana doodi doono.
Inkastoo kulanka maanta uu
baaqday haddana lama oga tallaabada xigta ee uu qaadi doono madaxweynaha oo hadda u muuqda in uu si toos ah u soo
fara-galiyay xiisada siyaasadeed ee ka dhax aloosan xildhibaannada Golaha
Shacabka.
C/raxmaan Diini,
Hiiraan Online
[email protected]