Sabti, Maarso, 03, 2018 (HOL) - Dowladda Burundi ayaa xaqiijisay in ku
dhawaad 5 Askari looga dilay weerarkii shalay Al-Shabaab ay ku qaadeen degmada
Balcad ee gobolka Shabeelaha Dhexe.
Dowladda Burundi waxaa ay sheegtay in ciidamadeeda qeybta ka ah howlgalka
AMISOM laga dilay Askartaasi xilli ay doonayaan in ay ku socdaalaan wadda u
dhaxeysa magaalooyinka Jowhar iyo Balcad.
Gaston Sindimwo madaxweyne ku-xigeenka koowaad ee Burundi ayaa sheegay in dowladda Burundi ay aad uga
naxday geeridda Askartaasi, waxaana uu sheegay in ay sii wadi doonaan
howlgallada ay ka waddaan Soomaaliya.
Laakiin Gaston ayaa waxba kama jiraan ku tilmaamay sheegashada Al-shabaab ee
ah in weerarkaasi ku dileen ilaa 20 Askari oo ka tirsanaa ciidamada Burundi.
Waxaa uu sidoo kale tilmaamay in aysan jirin Gaadiid looga gubay Weerarkii
shalay Al-Shabaab ay ku qaadeen degmada Balcad.
Dagaalka shalay ka dhacay degmada Balcad ayaa noqonaya kii ugu khasaaraha
badnaa ee waayadan lagu qaado deegaan ay maamusho dowladda Soomaaliya.
C/raxmaan Diini, Hiiraan Online
[email protected]