Sabti, Maarso, 03, 2018 (HOL) - Ra’iisal wasaaraha Soomaaliya Xasan Cali
Khayre ayaa sheegay dhowaan magaalada Muqdisho in ay ka bilaaban doonaan
Howlgallo culus oo ammaanka lagu sugayo.
Ra’iisal wasaare Kheyre ayaa sheegay in degmo walba oo ka mid ah Muqdisho
laga hergaliyay ciidamo suga amniga, wuxuuna shacabka uu ka dalbaday in ay la
shaqeeyaan ciidamada, taasi bedelkeeda ciidamada ayuu ugu baaqay in ay shacabka
u dhimriyaan.
“Waxaa la isku soo dhaweeyay guddoomiyeyaasha iyo taliyeyaasha, si loo
dardar- geliyo sugidda howlaha ammaanka, shacabka waxaan ka codsaneynaa in ay ciidamada
la shaqeeyaan, si looga hortago falalka ka baxsan amniga,” ayuu yiri Khayre.
Maamulka gobolka Banaadir ayaa lagu waddaa in ay kaalin lixaad leh ay ka
qaataan howlgalkaasi, oo markii ugu horresay ay ka qeyb-gali doonaan fulintiisa
ciidamada Asluubta iyo kuwa Midowga Afrika ee AMISOM.
Ciidamada Ammaanka dowladda Federaalka ayaa kordhiyay howlgalada ammaanka
lagu xaqiijinayo ee ay ka sameynayaan gudaha iyo deegaannada ka baxsan caasimada, iyada oo ciidamada
Khamiistii ina dhaaftay ay ka hortageen gaari miineysan oo la sheegay in loo
doonayay in lala soo galo Muqdisho, balse ku qarxay Bar-Kontorool oo ku taalla
degaanka Siinka-dheer.
C/raxmaan Diini, Hiiraan Online
[email protected]
