Axad, Maarso, 25, 2018, (HOL) - Guddiga Difaaca
ee Golaha Shacabka Baarlamaanka Soomaaliya ayaa maanta oo Axad ah lagu wadaa in
ay kulan la yeeshaan Wasiirka Gaashaandhigga Xukuumadda Federaalka Soomaaliya
Maxamed Sheekh C/raxmaan Mursal.
Kulankan ayaa diirada lagu saari doonaa arrinta
la xiriira xiisada ka taagan magaalada Beled- Xaawo iyo sidii wax looga qaban
lahaa.
Sidoo kale warar soo baxaya ayaa waxa ay
sheegayaan kulanka Guddiga Difaaca ay la qaadanayaan Wasiirka Gaashaandhigga in
ay qeyb ka yihiin Wasiirada Amniga iyo Arrimaha Gudaha, oo iyaguna arrintan ay
quseyso.
Senetarada Aqalka Sare oo shalay kulan ku yeeshay
magaalada Muqdisho ayaa codsaday in si deg deg ah loogu yeero Wasiiro ka tirsan
xukuumadda Soomaaliya, sida Wasiirada Arrimaha Gudaha, Amniga, Difaaca &
Arrimaha Dibadda.
Waxaa ay sidoo kale codsadeen in wax laga
weydiiyo Maamulka Jubbaland iyo Guddiga Xuduudaha dhibaatada ay Kenya ku heyso
shacabka degan degmadaasi.
Degmada Beled-Xaawo ee Gobolka Gedo ayaa shacabka
ku nool waxa ay sameynayaan Barakac, kadib markii Ciidanka Kenya Gaadiidkooda
dagaalka ay la soo galeen gudaha magaaladaasi.
C/raxmaan Diini,
Hiiraan Online
[email protected]