Jimco, Maarso, 02, 2018 (HOL) - Shirka Guddiga Amniga Gobolka
Benaadir oo guddoominayey Duqa Muqdisho Cabdiraxmaan Cumar Cusmaan Yariisoow oo
ay ka qeyb galeen guddoomiye ku-xigeenka Amniga iyo Siyaasadda Maxamed C/laahi Maxamed, taliyeyaasha qeybta
gobolka ee ciidamada Millatariga, Booliska, Nabad-sugidda iyo Asluubta ayaa
waxaa looga wada hadlay afar qodob oo mudnaan u leh ammaanka Caasimadda.
Waxaa sidoo kale kulanka lagu falan-qeeyay hab dhinac waliba
leh ee wax looga qaban karo xaaladda amniga caasimadda, kaas oo aad muhiim u
ah, maadaama la diyaariyey ciidamo isku dhafan oo ka shaqeeya sugidda amniga
iyo sidii looga hortagi lahaa weerarada Shabaab ay geystaan.
Guddoomiye Yariisoow oo kulanka ka hadlay ayaa ku dheeraaday
halka uu marayo qorshaha wadajirka ah ee wax looga qabanayo caqabadaha dhinaca
ammaanka, iyada oo la kaashanayo qeybaha ciidamadda iyo shacabka Soomaaliyeed
sidii guul mirro dhal ah looga gaari lahaa xasillinta caasimadda.
“Xasillinta amniga caasimaddu ma ahan arrin hal maalin oo
qura laga shaqeeyo, waa in aad si joogto ah uga ka qeyb-qaadataan, adinkoo la
imaanaya wax-qabad kaashanayana shacabka, si aan uga guuleysano argagixisada mar
walba dhibaatada u geysanaya nafta iyo maalka shacabkeena, waana in aad
qaadataan mas'uuliyad naga wada saaran arrintan”ayuu yiri Guddoomiye Yarisow.
Guddoomiyaha Gobolka Benaadir Cabdiraxmaan Cumar Cusmaan ayaa kula
dar-daarmay saraakiisha kulanka ka qeyb galay in la dardargeliyo amniga caasimadda,
si looga hortago qorshe-yaasha ay maleegayaan Shabaab.
Kulanka ayaa waxaa intii uu socday diiradda lagu saaray,
dhacadadii degmada Warta Nabadda oo koox burcad ay boob iyo dil u geysteen
ganacsato Soomaaliyeed iyo nin Bajaajle ah oo lagu dilay degmada Hodan, iyadoo
dhammaan gacanta lagu soo dhigay dadkii ka danbeeyey falalkaas oo hadda ku
xiran CID sharcigana la horgeyn doono, waxaana hoosta laga xariiqay in aan la
aqbalayn shaarka dawladda in lagu dhibaateeyo shacabka.
Kulanka ayaa ugu danbeyntii lagu lafa-guray qaabka ugu habboon ee ciidamadda
xoogga dalka Soomaaliyeed ee aan ka tirsanayn Guutada 12 abriil looga saari
lahaa magaalada, dibna loogu celin lahaa xeryahooda, si loo adkeeyo
dhaq-dhaqaaqa amniga Muqdisho.
C/raxmaan Diini,
Hiiraan Online
[email protected]