Isniin, Maarso, 19, 2018 (HOL) - Feysal Cabdullaahi Cumar oo 16 sano jir
ku dhaqan degmada Jowhar ayaa iska diidey sida uu hadalka u dhigay xilka
guddoomiye ku-xigeenka arrimaha bulshada degmada Gambole ee gobolka Shabeellaha
dhexe oo sida uu hadalka u dhigay uu u magacaabay Wasiirka arrimaha gudaha
maamulka Hirshabeelle.
Laakiin Wasiirka arrimaha gudaha Hirshabeelle Maxamed Cali Caadle ayaa waxba kama jiraan ku tilmaamay
sheegashada Wiilkan dhalinyarada ah, isaga oo beeniyay in Ilmo Yar sida uu
hadalka u dhigey oo 16 sano ah uu xil u magacaabay.
Wuxuu sheegay in laga yaabo in wiilkan yar uu warka si qalad
ah ku gaaray ama uu jiro qof ay isku magac yihiin oo xil loo magacaabay, isaga
oo meesha saaray in marnaba Wasiiradiisu xil u magacaawday wiilkan la hadlay
warbaahinta.
''Annaga qofka aan magacaawnay waa qof weyn oo mas'uul ah, maanta Soomaaliya xilka oo ah mid la wada raadinayo oo beellaha oo dhan isku wada heystaa in aan u magacaawno wiil 16 sano jir ah oo ardey ah, waad garan gartaa in aysan suurtagal aheyn'' ayuu yiri Wasiirka.
Feysal ayaa sheegay in markii hore waalidkii lagu
war-galiyay in uu Siminaar ka qeybgalo, laakiin taa badalkeeda uu ka war helay
oo kaliya magacaabistiisa.
Wasiirku ma uusan soo bandhigin magaca iyo da’da qofka ay u
magacaabeen guddoomiye ku-xigeenka degmada Gambole oo ah xilka uu ku doodayo
Feysal in loo magacaabay.
Feysal Cabdullaahi Cumar ayaa ah Ardey dhigtay fasalka 4aad
ee Dugsiga Sare Sheekh Xassan Barsane ee magaalada Jowhar.
C/raxmaan Diini, Hiiraan
Online
[email protected]