Talaado, Maarso, 13, 2018 (HOL) – Madaxweynaha Somaliland Muuse Biixi
Cabdi ayaa safar aan la sii shaacin ugu anbabaxay maanta dalka Iskutaga
Imaaraadka Carabta.
Biixi waxaa safarkiisa ku wehlinaya Wasiirro ka tirsan
xukuumadda Soomaaliland oo ay ka mid yihiin WasiirkaArrimaha
dibedda, Qorshaynta, Ciyaaraha, Arrimaha Distuurka iyo Biyaha; iyo sidoo kale,
guddoomiyaha Xisbiga Mucaaradka ah ee UCID, Eng. Faysal Cali Waraabe.
Saxaafadda lama uusan hadal, laakiin booqashadiisa ayaa imaneysa
xili uu cirka isku sii shareeray
khilaafka ba’an ee ka taagan heshiiska dekedda Berbera, kaasoo hadda u muuqda
mid sii xumeeyay xiriirka dhinaca Diplumaasiyada ee Soomaaliya iyo Imaaraadka,
kaddib markii shirkadda DP World ay ku eedeysan dowladda federaalka in ay ku
xadgudubtay Siyaaddada iyo Qarannimada Soomaaliya.
Madaxweynaha Soomaaliya Maxamed Cabdullaahi Farmaajo ayaa dhawaan
digniin u diray shirkaddaha iyo dowladda shisheeye ee sida uu hadalka u dhigay
doonaya in ay ku xadgudbaan Qarannimada Soomaaliya, laakiin si gaar ah
madaxweynuhu uma uusan soo hadal qaadin shirkadda DP World iyo arinta dekedda
Berbera.
Laakiin Baarlamaanka Soomaaliya oo maalintii shalay fadhi ku
yeeshay magaalada Muqdisho ayaa gabi ahaanba sharci daro ku tilmaamey
heshiiskii Berbera ee saddex geesoodka ahaa, sidoo kalana baarlamaanku waxaa uu
shirkadda DP World ka mamnuucay in ay ka howlgasho gabi’ahaanba dalka
Soomaaliya.
Golaha Wakiilada Somaliland oo iyaguna maanta fariistay
magaalada Hargeysa ayaa sharci ku tilmaamay heshiiska Berbera Baarlamaanka
Soomaaliyana waxba ka quseyn.
C/raxmaan Diini, Hiiraan Online
[email protected]
